Blerim Rrecaj: Shqetësime për rrjedha e zhvillime…

Shqetësime për  rrjedha e zhvillime…

Nga Blerim Rrecaj

Derisa shkoj të shoh dike të afërm në spital, në klinikën infektive, në atë varg makinash që edhe mund ta quajmë tollovi komunikacioni shoh një veturë me targa as tëSerbisë as të Republikës së Kosovës, por në targat e saj para e mbrapa mbajnë “regjistrimin” e veçantë “KAOSOVA”. Derisa ky mbishkrim ma tërheq vëmendjen nga autobusi ku ndodhem them vetmevete  se a thua se si do të e shpjegonte shoferi që nget këtë automobile me  këtë( vetë)regjistrim targash. Edhe nëpër faqe gazetash paralajmërohet Kaos në Kosovë, këtë herë nga Avokati i Popullit. Kronikat televizive për flakët që kanë pushtuar malet shqiptare e ato ballkanike zënë mjaft vend nëpër ekrane. Në njërën prej kronikave thuhet se në njërin nga rajonet e Kosovës as sot zyrtarët policorë nuk pranuan të deklarohen për mediet. Flitet me të madhe për shkaktarin e zjarreve duke u koncentruar në dy-tri pistat e mundshme: temperaturat e larta, pakujdesinë dhe në pistën e pistë: dorën djallëzore. Po aq sa për “Flakën e Maleve” po flitet edhe për bisedimet me Serbinë dhe ato po komentohen, kundërshtohen, përkrahen, po jepen ide a modele se si duhet të bëhen duke lënë pas shqetësime e turbullime nga gjithë ajo që po thuhet për to. Dhe sikur kemi një përsëritje të kronikave kaotike apo edhe një episod të ri të pyetjes: Çka po ndodh e çka po e do të bëhet. Dhe vazhdojnë shumë ngjarje ndodhi të gërshëtohen kur po paralajmërohet shtator i nxehtë me zhvillime këso e aso fare. E ne mbase spektatorë zhvillimesh si të dënuar me burgim, të getoizuar po përballemi me ngritje çmimesh dhe me fjalë që s’po mbarojnë për privatizim e liberalizim. E rreth e përçark, mbrenda e jashtë rrëmuja mbizotëron, me kaos-hane e ad hoc-hane. E dikush edhe është kujtuar të vë në treg bluza edhe me këto mbishkrime (e mbase ka dhe të tjera): “Mos ma çaj kryet se boll e kam të çame”, “Thirrëm si të duash, veç shef jo”, “Zoti hajr e boft” …

Mbase desha të them se nëpër kokë nuk po na shqiten shqetësimet e thella por ato nuk janë të barabarta me asnjë lloj defetizmi…