Vangjush Ziko: Trishtim në zoopark

Vangjush Ziko

TRISHTIM NË ZOOPARK

LUANI

Luanin e pashë

në park zoologjik.

Krenare kreshtën e kish.

Kish putrën

dhe thonjtë,

sigurisht.

Coptonte një copë mish.

Mish

që i hodhën bujarisht.

Pashë në sytë e tij

dhe trishtim.

Pashë Afrikën si vezullim.

Savanën pa bar

e pa shkurre.

Rrethuar

me hekurat mure.

Pashë lotin e tij

që u var

edhe ra

si oaz

në kafaz.

MAJMUNI

Majmuni

majmun.

Po kruhet.

Pështyn.

Bananen po ha

dhe po më përqesh.

Gjuhën më nxjerr

dhe qesh.

Qesh si majmun.

Qesh pa kuptim.

Dhe më tregon

mollaqet e tij...

Qesh edhe unë

me veten.

(Jo me majmunë).

S' kemi ndryshuar shumë,

të shkretën!

SHQIPONJA

Shqiponja më dhimbset.

Besoj,

më kuptoni.

Shqiponjën

pse ma trazoni,

Lereni zot!

Zot të kreshtave

dhe zot të qiellit.

Në mes stuhive

edhe rrufeve.

Mbi krahë diellin

dhe tufën e reve.

Të hedhë hijen

mbi dhe'

si bekim....

Shqiponja në sy

po më sheh

me përçmim.

Ula sytë

përdhe.

Nuk flas.

Shpirti im

psherëtin

në kafaz.

2011