Sami Islami: A luftonit me turq nganjëherë?

Sami ISLAMI

A LUFTONIT ME TURQ  NGANJËHERË?

Joni i vogël shtatëvjeçar

Sa e mbaroi klasën  e parë

Mësoi të shkrunte e lexonte

Dhe historia e ngacmonte

Kur pa filmin për Skënderbeun

Filloi ta donte ma shumë Atdheun

Krenohej shumë me trimat shqiptarë

kur pa t’ luftonin turkun barbar.

-Po ç’deshi  turku në vendin tonë ?

e pyti babin, i vogli Jon.

-Erdhi këtu për me na pushtu.

Shqiptarët  m’i asimilu.

…Por trimat luftuan  për këtë tokë

Si luftoi  Gjergji me shokë

Për me mbrojtë gjuhë e kulturë

Për me mbrojtë të shejtin flamur…

* * *    

Pas ca kohësh në një incizim

E pa babin në një  verim

Në plazhet e bukura të Turqisë

Në bregdet  të Anadollisë!

Kur fjalën “Turqi” e dëgjoi

Te Skënderbeu mendja i shkoi

Që kundër saj kish’ luftu

Shqiptarët për m’i shpëtu

Dhe për t’u vërtetu se ç’ pa

Edhe një herë babit i tha:

-Kjo që po duket është Turqia?

-Po- tha babi është  Antalia.

-Po a kishte turq në Antali ?

E pyti Joni me shpejtësi.

-Po,i tha babi,  kishte plot

Që s’mund t’i numëroje dot!

Joni pak kohë  u mendu

I çuditur për ç’kish’ mësu.

E pyti babin edhe një  herë

-A luftonit me turq nganjëherë?

Të gjithtë sa qenë ia plasën gazit

E  Joni ziente prej marazit,

- A thu - tha - mos bana gabim

Që për këtë e pyta babin tim?

Londër, 25.12.2010