Vullnet Mato: Truri i njeriut

Vullnet Mato

TRURI I NJERIUT

Truri elektronik

mund të arrijë përsosmërinë.

Mund të kryej llogaritje

mbi limitet që njeh bota.

Shkenca mund ta zëvendësojë

me robotin shtatë kokësh njerinë.

Por prapë,

truri vigan i njeriut i bën ato koka.

Mund të shkurtohen

largësitë astronomike në kozmos.

Galaktikat mund të bëhen

një vrapele me tokën.

Elektronika mund të arrijë

ç’mund e çmos.

Por prapë,

truri i njeriut do ta drejtojë botën.

Miliona makina

lindin në ditë uzinat,

por edhe miliona fëmijë

vdesin në ditë.

Ata që me bukën dhe qumështin

ushqejnë makinat,

pse trurin e njeriut e çmojnë

më pak se një vidë ?...