Kulturë
Anton Nikë Berisha: Përsiatje të qenësishme për jetën si dashuri dhe për dashurinë si jetë
E hene, 27.06.2022, 07:40 PM
PËRSIATJE TË QENËSISHME PËR JETËN SI DASHURI DHE PËR DASHURINË SI JETË
–
Parathënie –
Nga
Anton Nikë Berisha
Libri
“Çdo ditë është një thesar – 365 +1 Meditime dhe copëza nga rrjedha e jetës” e
dom Dominik Kukelit SBP, përligj një dukuri të lashtë të njeriut: synimin t’i
shprehë në mënyrë sublime dukuritë e jetës, besimin dhe fatin e tij. Ata që
janë përcaktuar për një mënyrë të këtillë të të shprehurit duhet t’i kenë
pasur, pos të tjerash, tri cilësi të rëndësishme: dijen, sa të gjerë aq dhe të
thellë të fushave për të cilat kanë shkruar, përvojën e pasur jetësore dhe
aftësinë për t’i thënë ato në mënyrë sa më të qartë e të përshtatshme që pastaj
të përfillen dhe të bëhen pjesë e pasurisë shpirtërore dhe mendore e tjetrit.
Dom
Dominik Kukeli këto prirje dhe cilësi i dëshmon nga fillimi deri në fund të
librit, duke vështruar e shprehur disa nga dukuritë më të qenësishme që
ndërlidhen me veprimin e njeriut në
jetën konkrete, me besimin në Hyjin, me përshpirtshmërinë dhe me dashurinë ndaj
tjetrit si kusht për jetë të mirëfilltë dhe për jetën e pastajme, pas vdekjes.
E ndriçon sidomos dashurinë si jetë dhe jetën si dashuri, përkatësisht
rëndësinë e dashurisë së Hyjit përballë njeriut dhe dashurinë e njeriut: “Lum
ai që banon në shtëpinë tënde: / i këndon pa fund lavdet për ty” (Ps 84, 5)[1]
.
Dashurinë
e Hyjit ndaj njeriut dhe nevojën që kjo dashuri të përfillet dhe të bëhet pjesë
e jetës dhe e frymëmarrjes në jetën e përditshme të njeriut, si krijesë e vetë
Hyjit, dom Dominiku e shpreh në mënyra të ndryshme dhe përmes argumenteve që e
kanë burimin në Shkrimin e Shenjtë dhe në literaturën teologjike, ku thuhet se
çdo vepër e Hyjit është dëshmi e dashurisë dhe është e bukur: edhe kur e krijoi
dritën, edhe kur i krijoi Qiellin dhe Tokën, edhe kur e krijoi njeriun “Zoti pa
se ishte gjë e mirë... se ishte gjë shumë e mirë” (Zan 1, 12 dhe 31 dhe 1Tim 4,
4). Kjo shprehet në mënyrë sublime sidomos në Psalmin 118 (119): Dashuria jote
le të jetë ngushëllimi im (76) dhe në Psalmin 18, 2 – 3: Hyj, shkëmbi im [...]
shkrepi im në të cilin unë strehohem, mburoja ime, shpëtimtari im i fuqishëm
dhe ledhi im.
Jetën
e njeriut autori e cilëson si një mrekulli të krijuar nga Hyji dhe aftësinë e
tij që, përmes besimit në Hyjin, të mund ta përjetojë dhe ta jetojë këtë
mrekulli. Gjithë kjo ndërlidhet me besimin – me dashurinë hyjnore dhe me
dashurinë e njeriut ndaj Hyjit dhe ndaj të afërmit, ndaj tjetrit. Nëna Tereze
thoshte “Të besosh domethënë të jetosh [...] Besimi është e vetmja gjë që
qenësisht është e jona [2]” dhe “Feja është një dhuratë e Zotit. Pa të nuk mund
të kishte jetë[3] ”. Në të vërtetë, duke besuar në Hyjin e gjithëpushtetshëm
dhe duke jetuar në dritën dhe hirin e Tij: Hyji është drita dhe shpëtimi im (Ps
27, 1) dhe njeriu bëhet “[...] një laps i Zotit. Një copë lapsi me të cilin Ai
shkruan atë që do [4]”.
Nisur
nga këto përcaktime dom Dominiku e shpreh dhe e ndriçon në disa rrafshe faktin
se Hyji është mbrojtja e jetës sime (Ps 27, 1) dhe Hyji im më paraprin me
dashurinë e tij (Ps 59, 11) ose “Gjithçka që bëjmë e bën Zoti nëpërmjet nesh[5]
”.
Mendimet
e shprehura nga autori, shpesh marrin formën e fjalëve të urta, dëshmohet se
etja për dashuri dhe etja për jetë, janë dëshmi e jetës për Zotin; jeta është
dhuratë e Zotit për njeriun; të duash dhe të jesh i dashuruar në Hyjin dhe në
njeriun, janë dy faqet e së njëjtës medalje. Dom Dominiku i ka dëshmuar këto në
jetën e vet në dy mënyra: 1) dashurinë për Hyjin, duke u përcaktuar që gjithë
jetën e vet t’ia kushtojë Atij dhe 2) këtë ta dëshmojë përmes flijimit të tij
duke e dashur njeriun dhe duke u flijuar për të.
Këtë
dashuri të dyfishtë, të pandarë, që e përligj dhe të vërtetën, don Dominiku e
shpreh me ndjenjën e përvujtërisë, të përgjegjësisë dhe të bindjes; ai flet për
mëkatet e njeriut, po dëshmon dhe për mëkatet që i ka bërë në jetën e
përditshme përballë besimtarëve dhe nxënësve, duke qenë i vetëdijshëm për
mëshirën e paskajshme, që Fjala e mishëruar është në gjendje t’ia fjalë, po dhe
t’i japë forcën e duhur që të ngadhënjejë mbi dobësitë e tij dhe të tjetrit:
Lum njeriu të cilit i është shlyer faji / dhe i është falur mëkati (Ps 32, 1).
Mendimi
i don Dominikut në këtë libër është i thellë dhe ngrihet mbi përvojën e jetës e
të leximit të vëmendshëm; është i sinqertë dhe thuhet me një shqipe të
natyrshme dhe me drejtpeshim. Kështu, thesarin e përvojës dhe të dijes së tij
të fituar nga veprat e autorëve paraprakë, sidomos Biblës, e ndan me të tjerët
për arsye se tjetri, si qenie – krijesë e dashurisë së Hyjit dhe si etje dhe
ndihmesë për jetë, pa tjetrin është i pavlerë.
Gjithë
ajo që thuhet në këtë vepër në formën e mendimeve të përmbledhura, sublime,
qoftë kur bëhet fjalët për dashurinë ndaj Hyjit, qoftë për dashurinë e njeriut
ndaj tjetrit, për të vërtetën dhe për lirinë e mendimit dhe të veprimit të
njeriut, për nevojën e shenjtërimit të tij në jetën tokësor, ndërlidhet me
hapjen e shtegut për jetën e përtej vdekjes, me jetën në shtëpinë e Hyjit dhe
në kopshtin e prehjes së amshuar.
Kush
dëshiron të kridhet dhe të mësojë thellësisht për këtë botë, leximi i këtij
libri të dom Dominikut i hap një varg mundësish dhe e bind për vlerat dhe
rëndësinë e shumëfishtë të asaj që thuhet në të.
Prishtinë, prill 2022
[1]- Përkthimin e mora
nga Psalmet. Shqipërimin dhe parathënien Anton Nikë Berisha. Arqipeshkvia
Metropolitane Shkodër – Pult, Shkodër 2017.
[2]- Thirsting for God.
A Yearbook of Prayers, Meditations, Anevdots, Edited by Angelo Devananda
Scolozzi, Servan Books, Ann Arbor (USA) 2000, f. 114. Shih Gloria Germani,
Teresa di Calcutta una mistica tra Oriente e
Occidente. Paoline.
Milano 2003, f. 195.
[3]- Madre Teresa di
Calcutta, Tu mi porti l’amore. Scritti spirituali. Città Nuova Editrice, Roma,
X edizione, 2005, f. 8.
[4]- Edward Le Joly,
Madre Teresa e le Missionare della Carità. Lo Facciamo per Gesù. Famiglia
Cristiana. Milano 2003, f. 109.
[5]- Mario Bertini,
Sulle strade di Madre Teresa. 2° Edizione. Paoline. Milano 2003, f. 124