Editorial
Xhemal Ahmeti: Beteja e iknojmenës me krokodilin e Nilit
E diele, 27.12.2020, 06:33 PM
BETEJA E IKNOJMENËS ME KROKODILIN E NILIT
Për
tu orientuar pyllit të mentaliteteve njeriu krijon imazhe që i shërbejnë si
stacione udhërrëfyese. Saherë ai me vetëdije e aktivizon një imazh që nëpërmjet
tij të zhytet sa më lehtë bodrumeve të psikozave të kohës, ia zë udhën atij një
tjetër imazh, i paftuar: çka do thotë kjo kur donë të mendosh në njerëz e në
vend të tyre të shfaqen mace, krokodilë, kuçedra e përbindësha tjerë nga
sarkofagët para-antikës [nuk e pyesim Lacanin se ai me automatizëm na nxjerr
organet gjenitale të Freud-it në vitrinë]
NGA
XHEMAL AHMETI
Saherë
sinjalizohen zgjedhje, njeriu, i cili politikën e konsumon si opiat, saora
bëhet eidetik, nis t’i parafytyrojë situatat, pasojat dhe rezultatet sikur ato
të kishin ndodhur para dekadash. Kështu edhe unë si shumica prej jush nis të
kalkulojë se kush dhe sa do t’ia dalë kësaj radhe. Filmin mirëpo ma ndërpreu,
ma sabotoi një skenë e çuditshme nga Nil-i egjiptian, e cila u shfaq e paftuar.
Më kot u përpoqa t’i dëboj figurat e metaforës me drama faraonësh nga vrimat e
mia të zeza mentale. U dorëzova. Për ngushëllim pranova pa e vërtitur fare
truve tezën Konfucios që dërdëllis «udha të jetë caku» e jo ai stacioni i
fundit që ne imagjinueshëm mezi presim ta mbërrijmë nga presioni dhe frika se
që tash zemra mund të na dhi planet duke ia fajt pa pajt ndonjë greve të
përhershme.
I.
Cila
qe legjenda që m’i hoqi nga tribuna imagjinare primatët e bukur/a shqiptare ose
folur me gjuhën e gjeografit; kush u bë shkaktari kauzal që m’i dëboi frizurat
e parisë kosovare nga mendja, duke m’i sjellë shtazët e Afrikës parasysh? Dy
protagonistët kryesorë të legjendës janë Iknojmena [mace e tipit Herpestes
ichneumon, e cila dallohet për nga trupi i gjatë dhe këmbët e shkurtra,
habitati i së cilës është Savana në Afrikë, Azi të Vogël dhe Palestinë] dhe
krokodili i Nil-it. Tash do thoni: «ky ka halucinacione!». Nga ç’ dreq skute më
erdhën macet dhe krokodilët gjersa me mundin si ai Sizifit përpiqesha t’i bëjë
parasysh simpatik Albin Kurtin, Isa Mustafën, Enver Hoxhajn dhe tjerët? Mu
deshën ca minuta ekskursion me sy bibliotekës ta gjej fajtorin: Në librin e tij
«Çaste të forta - një fizionomi e mistikës» [MS 2013] kritiku letrar László F.
Földényi ia kushton një kapitull kësaj metafore historimadhe.
Metafora
ka kapital të madh historik ngase ajo përshkon vepra të rëndësishme të
kulturologjisë humaniste që nga bibla e deri tek hungarezi Földényi. Macen,
Iknojmena e kishin për simbol në flamur disa nga faraonët. Këta e sakralizonin
këtë specie barazi me Harporkratin [Perëndinë (e fëmijëve ose) fëmijë]. Ndërkaq
Krokodili specifik i Nilit, vizatohet herë si demon që mund ta përmbysnin vetëm
profetët dhe mesia [perspektiva hebreje kundër sundimit egjiptian] e herë të
jetë perëndia e fshehur pas shifrave 6, 60 dhe 666 e mistikëve [sofisti Aelian]
e së fundi duket të jetë vetëm figurë që në relacion me macen e zgjuar
simbolizojnë pushtetin dhe popullin në pozita reciproke. Prandaj sagën e gjejmë
tek Ezekieli [29,3], Hijobi [41,1,6,14], tek Herodoti, Pliniusi, Oppiani,
«Physiologus»-i, Aeliani dhe tek çdo filozof që mëton këtë luftë
[pushtet-popull dhe anasjelltas] ta paraqes si situatën më konstante të
historisë njerëzore.
E
legjenda ku mbeti, u humbëm historisë së interpretimeve? Durim siç thoshte
Rugova kur donte ta ndez një cigare. Tash e tregojmë:
II.
Saherë
egjiptianet niseshin për të larë tesha buzë Nilit i sulmonin një batalion
krokodilësh. Jorrallë ato e gëlltisin ndonjë fëmijë të zhytur në lojë me
guralecë. Si sot edhe atëherë: priftërinjtë e Faraonit interpretonin
fatkeqësinë duke thënë se Amun Re, kryezoti i acaruar me ndonjë sjellje të
egjiptianëve e sidomos me robërit e tyre zotashumë, urdhëron në sulme asasinët
e tij – krokodilët për tu hakmarrë! Një ditë ndodh mrekullia. Pas ca vërshimeve
që përmbysin qindra kilometra përreth Nil-it «zhduket popullata masive» e
krokodilëve përbindësha. Pas veti lënë ndonjë gjumash të tyre që pastaj
vërdallet i vetëm moçaleve për mbijetuar duke e zënë për këmbësh ndonjë mace.
Dikur egjiptianët vërejnë se rreziku nga krokodilët paska kaluar. Faraoni
mbledh ulemanë e tij dhe u kërkon përgjigje: Cili Zot e cila fuqi i përzuri
krokodilët? Murgjit e oborrit njëzëri i ulërijnë: Iknojmena! E si kur ajo është
vetëm një mace e egër dhe e vogël? Ja si i thonë murgjit e tij: Ajo është e
vogël por inteligjente shumë. Pasi që kryekrokodili ia gëlltiti t’ ëmën,
Iknojmena vendos t’i hakmerret jo vetëm atij por gjithë species së , duke ia
bërë të qartë se jo fuqia por zgjuarsia dhe durimi triumfojnë përherë. Ajo u
lye me baltë saqë as sytë nuk i dukeshin dhe priti me ditë e me javë pas një
grumbulli ferrash pranë Nilit. Dhe dikur i vjen çasti: kryekrokodili nxjerr
kokën mbi ujë, shikon majtas lag turinjtë djathtas, rrotullon sytë formëkompasi
dhe hapë gojën e tij të madhe duke gogësijë: koha për gjumë? Ndryshe i ka
planet Iknojmena e cila trajtëson trupin si raketë dhe me një shpejtësi
marramendëse i futet nëpër tunelin e tij fytor e drejtë në stomak. Atje brenda
ia gërryen si e çmendur organet e brendshme. E ç’të bëjë krokodili që tërë
jetën ka luftuar e ngrënë armiqtë e jashtëm? Si të luftojë brenda vetes, me
barkun e tij? As njeriu që ka duar e që konsiderohet më i mençuri i specieve
nuk e fut dot krahun brenda vetes për t’ia hequr adenomën a kancerin mushkërisë
që ia përgjak sytë në pasqyrën e tij prej urine? S’ka asnjë mundësi. Pas ca
minutave derdhet i pajetë krokodili i gjorë. Dikur nga mesi i tij çon kokën
Iknojmena. Triumfatorja përcjell mbi eshtrat dhe lëkurën e të parit të tyre
radhët e krokodilëve në ikje drejt horizonteve gri.
Faraoni
syhapur e i tmerruar nga rrëfimi çon unazën drejt qiellit, ia fut vulë
papirusit që ia kanë shtri murgjit para hundëve dhe shpall Iknojmena-n perëndi
dhe simbol për flamur!
III.
Rrëfimi
pak i ekzagjeruar stilistikisht nga autori «fantaziplotë» i këtij teksti është
tepër interesant si përrallë pro-miteri. Edhe më interesant dosido janë
përgjigjet ndaj dy pyetjeve; pse kjo metaforë rrëfehet edhe sot dhe pse ajo mu
shfaq gjersa mendoja për zgjedhjet shqiptare? Kush është në përkthim e sipër të
kodeve të kësaj legjende krokodili e kush macja? Kur flasim për inteligjencë
përherë e lidhim atë jo me masa njerëzish [tërësinë e atyre që përbejnë
popullin], por me individë ose grupe të mbiquajtura elita, pra del që macja e egër
të jetë politika, e krokodili të cilit ia ha Iknojmena me zorrë e me organe të
jetë shteti, populli, shoqëria – zgjuarsia dhe inteligjenca e të cilave nuk
matet dot [edhe po e matëm e dimë se tonat stomak krokodili janë]. E po u
kërkuan një ditë masat moralistëve të tyre zgjidhje për të ndryshuar fatin, pra
që krokodili ta zë me dhëmbë macen, para se ajo ta zbraz interierin e tij, çka
do tu thonë ata atyre? Cila mund të ishte përgjigja e tyre. Do të ishte e
njëjtë si ajo e murgjve të Faraonit: do t’ia rrëfenin kryeministrit kosovar
legjendën e njëjtë, por duke futur një sekuencë që e mbyll legjendën para kohe:
plani i Iknojmena-s dështoi ngase krokodili doli më djallëzor, duke improvizuar
gogësimën për ta vënë në kurth macen, ai doli poashtu më i shpejtë se ç
’shpresonte ajo dhe e gërreu në gojë.
Përralla
në shkallë shëndeti në ballë - krokodilit apo maces shëndetin, e cila për shkak
të rezistencës së saj kundër së keqes me siguri gjendet në parajsë?
Pyetjes
se a janë politikanët shqiptarët Iknojmena apo krokodili, shumica e njerëzve i
përgjigjen aq shpejtë me «po» ose «jo». Jo ashtu siç i perceptonte Pytagora i
Samo-s këto dy përgjigje, si rezultat i një reflektimi shumë më të gjatë se ato
përgjigjet që vijnë me sqarime shtesë. Veçanërisht ata që si rafalë prodhojnë
miliona «jo» e »po» gjatë ditës duket të jenë ata që trurin e përdorin vetëm
kur u hahet fli. Dhe kjo kategori duket të jetë sunduesja e mentalitetit të
shoqërive shqiptare [nëse mediat dhe rrjetin i pranojmë si pasqyrë të tyre].
Kjo ndodhë për një arsye të njohur: të menduarit është punë e rëndë, prandaj
shumica gjykon [Jung]. Ose mos ka kaluar vërtet para Palit edhe Konfucio
Ballkanit, ai kinezi që thoshte se njeriu ka tri udhë për të vepruar mençur:
duke menduar [fisnikja], duke imituar [më e lehta] ose duke provuar [më e rënda
dhe më e tharta]. Duke pasur parasysh se tek shqiptarët meshkujt janë shumicë
dhe historikisht i kanë shty gratë tu punojnë, lehtë kuptohet pse kanë zgjedhur
mesin e artë - të bëjnë jetë duke imituar! Kjo do të jetë «philosophia
perennis» e jetës së tyre. Përndryshe ata «nga gërmadha e zhgënjimeve të
deritashme [me politikën] do të kishin krijuar si shoqëri një karakter»
[Emerson] ndryshe dhe nuk do votonin as Iknojmena-n hakmarrëse që mund t’ia
hajë organet lirisë e shtetit të tyre e as krokodilin përtac e letargj, të
cilit kur i vjen gjumi jo ndonjë mace por edhe ndonjë aeroplan rus i depërton
në stomak dhe ai nuk e vëren fare. Prandaj ky riprodhim reciprok i hajdutëve
nga masat dhe masa nga hajdutët. Pa macen s’do dinim as historinë e krokodilit
e as anasjelltas. Galileo kishte të drejtë [Herder 1909: 90]: dy të vërteta nuk
e kundërshtojnë asnjëherë njëra tjetrën. Populizmi para se të flasë shikon në
gojë shumicën e mbiquajtur popull [Roth 2017: 21, 93]. Dy të vërtetat që nuk e
kundërshtojnë njëra tjetrën në kushtet janë shqiptare janë: masat hajdute
prodhojnë politikanë hajdutë dhe anasjelltas! Metoda e tyre poashtu përbëhet
nga dy të vërteta në harmoni: Iknojmena dhe krokodili për dallim nga rrëfimi
egjiptian në këtë shqiptar nuk janë në armiqësi por bashkëjetojnë në orgji.
IV.
Versione
ndryshe nga ky shkrim keni me shumicë mediave ku të «vërtetën» ua rrëfejnë Elvi
Naçi, Ebu Kastrati dhe plotë të llojit: omniprezenca e banalitetit me origjinë
nga bataku anash Nilit janë i vetmi mall «intelektual» për transport që ofrojnë
zonat mediale virtografike shqiptare! Legjenda të llojit mbi popullin e
shejntë, hajdutët përbindësha [që janë vetë] dhe Perëndinë [sot nuk e quajnë më
Iknojmena, as Zeus e as Amun Re por ndryshe] që hakmerret me tërmete, përmbytje
e covida. Shumica e mediave dhe publicistëve frekuental të tyre në raport me
dijet dhe kapacitetet tjera janë si ajo popullata brenda konstatimit të
Siegfried Lowitz-it, e cili thoshte: «kritikët janë si eunukët: ata e dinë se si
bëhet ajo punë, mirëpo s’mundet ta bëjnë vetë». Ndërkaq tipin më të përhapur të
politikanit e gjeni brenda thënies së Margaret Thatcher: «disa politikanë e
kanë shtyllën kurrizore aq të pazhvilluar ngase e përdorin rrallë» ose fare për
shkak të votave.
As
murgjit me siguri nuk do t’i thonë politikës dhe masave se që të dyja krijesat
e ekspozuara në këtë shkrim janë pjellë imagjinate dhe se ngjarja s’ka ndodhur
asnjëherë e tillë, prandaj si përbindshmëria ashtu edhe hakmarrja nuk duhet të
jenë Dào [?]
e Konfucios apo Laocis-së – udha e drejtë, principi absolut apo metoda e vetme
agonistike e politik-bërjes shqip. Nuk do të thonë murgjit e universiteteve, as
ata të mediave dhe këta rrjetit këndej ashtu për shkak edhe dy të vërtetave
pasuese [që ta bëjmë 6-in e mistikëve]: 1. Nuk dinë si ndryshe dhe 2. Ngase
Iknojmena-n dhe krokodilin duan t’i hanë vetë.