Kulturë
Kostaq Duka: Meditim për lirinë
E shtune, 19.02.2011, 08:56 PM
Kostaq Duka
Meditim për lirinë
-Triptik-
Bota dhe individi
Kur Bota po zvogëlohet çdo ditë
Zgjerohen e zgjerohen përmasat e lirisë....
Çdo kush bëhet nga pak e më shumë qytetar
Përtej një frymori që kafshon bukën e jetës
Në grazhde trashëgimish prindërore,
Në menca supash qeveritare.
Kur Bota zvogëlohet, zvogëlohet çdo ditë
Individi tek vetja
Jo nga zotat
E kërkon lirinë.
Leva
Me Levën e Arkimedit
Njeriu lëvizi Tokën dhe Universin.
Shekujsh,
Mbeti e mbeti në kërkim
Të Levës së vërtetë,
Për lëvizjen e lirisë së vetes.
Populli
Përsa kohë,
Populli është i droguar nga mashtrime diktatorësh
Ai është turmë,
Që lodhjen e ditës në shtrate ëndrrash rozë e ve në gjumë.
Veç
Kur lirinë e barasvlereson me ekzistencën,
Bëhet siç duhet të jetë popull misionar, që shëmb diktat e dhunë.
Shkurt, 2011.