Satira nga Sevdail Hyseni

Sevdail Hyseni

Satirike

Shitblerja

“Shtëpia në shitje”,

Në çdo anë të rrugës,

Njerëzit po na ikin

Për kafshatë të bukës.

Në heshtje largohen

Shpirtërisht të prekur,

Me vrap nëpër botë

-Ku bren miza hekur!

Maleve të Luginës

Nuk tymon oxhaku,

Në damarë të kombit

Po shterohet gjaku.

Eh, paria jonë

Me dy sy në ballë,

E ka future kokën

Si struci në zall.

E mendon pushtetin

Me shumë bajraktarë,

Në zgjedhjet e reja

Rroftë “Treni bullgar”!

NJERIU - UJK

Për filozofin e njohur Hobbes

- Njeriu për njeriun është ujk,

E harron se soji i njeriut hibrid

Të pret n’besë, të vret n’bukë!

Rreth këtij vlerësimi kemi dilema

Ndryshe mendon një nga Malësia,

Ujku sulmon vetëm kur e kap uria

Kurse njeriu nga inati dhe xhelozia.

Nga tufa e ujqërve nuk ka ndodhur

Mes vëllezërve ta kurdisin helmin,

Ujku nuk e mbyt të dashurën grua

Ulkonjën, që rriti Romulin e Remin.

Kështu ndodh vetëm mes njerëzve

Për një interes shkel çdo autoritet,

Njeriu vret gruan për një fjalë goje,

E tradhton vëllain për pak pushtet.

Në përralla shpesh quhet njeriu–ujk

Por, jo edhe në realitet, kurrsesi,

Nga të bëmat që i bëjnë njerëzit

Ujku nuk e pranon epitetin “njeri”!