Autori Fadil Sahiti me libër të ri: Politikat Industriale për Përmirësimin Teknologjik në Vendet e Ballkanit Perëndimor

Ndihem i gëzuar ngase doli nga shtypi libri im më i ri: "Politikat Industriale për Përmirësimin Teknologjik në Vendet e Ballkanit Perëndimor".

Libri është botuar nga shtëpia botuese Palgrave Macmillan – Springer, një botues i klasit botëror të librave dhe revistave shkencore, me më shumë se 175 vjet përvojë në Shkenca Humane dhe Shoqërore.

Në libër analizohen politikat industriale të ekonomisë së Shqipërisë, Maqedonisë së Veriut dhe Kosovës; efektet e tyre krahasohen me ato të politikave industriale të zbatuara në ekonominë e Sllovenisë si vend referencë. Gjithashtu në libër analizohen qasjet moderne të politikave industriale dhe propozohet një kornizë të re për këto politika. Zbatimi i politikave industriale që dalin nga kjo kornizë mund të çojë në zhvillimin e një sistemi kombëtar inovacioni që synon rritjen e efikasitetit të përdorimit të teknologjisë industriale dhe përmirësimin e vazhdueshëm të saj, si premisë për një zhvillim të qëndrueshëm social dhe ekonomik në vendet në zhvillim.

Më tej, libri thellohet në analizën e veçorive tekniko-ekonomike të këtyre vendeve të Ballkanit Perëndimor, si dhe identifikon disa opsione strategjike për politikat industriale. Në veçanti, libri potencon nevojën për një mendësi të re qeverisjeje, që në fokus ka zhvillimin industrial të vendit përmes krijimit të një sistemi kombëtar për inovacione. Analiza bazohet në literaturën bashkëkohore të politikave industriale; në punimet shkencore të fokusuara në ekonomitë në zhvillim (catch-up economies); literaturën e përmirësimit teknologjik dhe studimet e inovacionit, të cilat përfaqësojnë të menduarit aktual akademik në këto fusha.

Përveç online, libri është i disponueshëm në librari të ndryshme si Waterstone's në Britani; Barnes & Noble dhe ThriftBooks në SHBA; Lehmans dhe Hugendubel në Gjermani; Ex Libris në Zvicër, Adlibris Aktiebolag në Suedi, etj.

------------

Për të interesuarit libri gjendet në lidhjen e mëposhtme:

https://link.springer.com/book/10.1007/978-3-031-51429-6?fbclid=IwAR1HO3MBnkfGzzk7NQPFscpbtve2uPH_p7w9QLiwA3jkSpg_cwCxjPP7SBU