Blerim Latifi: Një përputhje që veç tek UÇK-ja mund të gjendej

Prof. Blerim Latifi:

Po shikoja disa video dhe fotografi të 40 luftëtarëve të UÇK-së, të cilët bashkë me Mujë Krasniqin 25 vjet më parë ranë dëshmorë të lirisë në Malet e Pashtrikut. Mes gjërave të shpërndara gjithandej vendit të rënies, kamera kishte fokusuar çantën e njërit prej këtyre luftëtarëve, në të cilën ndodhej edhe ky libër "Tregime të zgjedhura amerikane". Autorët më të mirë të letërsisë amerikane në çantën e një luftëtari të rënë për lirinë e Kosovës.

Çfarë shije estetike! Çfarë përputhje mes idealit të luftës dhe vlerave artistike! Një përputhje sublime. Një përputhje që veç tek UÇK-ja mund të gjendej.

___________

Viti 1915. Europa është përfshi nga flakët e Luftës së Madhe. Shqipëria e sapo bërë shtet është shndërru në fushëbetejë të ushtrive ndërluftuese. Në Vjenë, në konakun e Norbert Joklit, albanologut të njohur, me origjinë hebreje, janë mbledhur një mbrëmje Faik Konica, Fan Noli, Gjergj Pekmezi, Ismail Qemali, Fazil Toptani. Natyrisht për të diskutuar mbi fatet e të gjorës Shqipëri. Në fund të mbrëmjes Noli u lexon Shekspirin, të cilin kishte filluar ta shqipëronte. Të tillë ishin baballarët e kombit shqiptar, poliglotë e me kulturë të lartë intelektuale e estetike, por edhe nacionalistë të thekur. Fatkeqësisht, sot, në shumë pikëpamje, elitat politike e kulturore shqiptare janë shumë nën nivelin e tyre. Prandaj edhe punët zakonisht na ecin mbrapsht, sa herë kërkohet që ato t'i bëjmë vetë.

___________

Përgjithësisht këta të ashtuquajtur "teoricientë të konspiracioneve të mëdha" janë lloj i budallëve. Deri tash kam mendu se në trojet shqiptare budalla ma i madh në këtë fushë është ky i Shqipnisë, Alfred Cako, por jo, qenka një që po folka në një emision të TV Dukagjinit, i cili po ia kalojka Cakos. Ky qenka budallë me 5 yje.

Shqiptarët tepër mirë janë mentalisht kur e shohim se ndaj çfarë plehu e ndotësish medialë janë të ekspozuar.

___________

Hyra në market për të ble cigare. Një shitëse po i thoshte një burri se nuk mund t'ia merrte monedhën 2 euroshe, sepse ishte false. Derisa po ia kthente, e pashë se ajo monedhë e kishte të stampuar figurën e Dante Aligierit. U ktheva në shtëpi dhe mora Komedinë Hyjnore për të parë se në cilin rreth të ferrit Dante i ka vendosur falsifikuesit. Në njërin prej rrathëve më të tmerrshëm të ferrit, në të tetin.?

___________

Fotografi që thotë shumë për kohët e turbullta nëpër të cilat po kalojmë: një formacion i FSK-së dhe një nga Ushtria e Republikës së Shqipërisë gjatë një stërvitje të përbashkët në Bizë të Tiranës. Dy ushtri që një ditë kanë për t'u bërë një e vetme.