Blerim Latifi: Mashat terroriste të Rusisë nëpër botë janë aktivizu!

Prof. Blerim Latifi:

Mashat terroriste të Rusisë nëpër botë janë aktivizu! Me i ndihmu pak në Luftën e Ukrainës, duke ndezë vatra të reja ose të vjetëra konfliktesh të armatosura në botë.

Dy javë më parë tentuan në veri të Kosovës, por dështuan keq. Sot e paskan shti në lojë Hamasin, terroristët e të cilit paskan hyrë në disa fshatra në jug të Izraelit duke vrarë secilin që hasin, pa asnjë dallim. Sigurisht që të gjithë e dinë se Hamasi nuk ka asnjë gjasë për fitore në luftë me Izraelin. Brenda pak orësh do ta marrim vesh këtë punë. E di edhe Hamasi, por krejt kjo është për t'ia bërë një argat Rusisë në planet e saj për prodhimin e kaosit. Sepse tashmë po dihet se vetëm një botë e zhytur në kaos, është shpëtim për Rusinë. Për Rusinë e turpnume në Ukrainë. Për Rusinë e diskreditume politikisht, ushtarakisht e moralisht në tryezën e fuqive të mëdha.

___________

Psikologët e quajnë “disonancë kognitive”, një situatë mendore në të cilën bindjet e sjelljet njeriut nuk përputhen apo janë në kontradiktë me informacionet empirikisht të bazuara që i merr njeriu. Kjo situatë rëndom shoqërohet me stres të theksuar psikologjik, gjatë të cilit njeriut manifeston një lloj dezorientimi në sjellje e veprime.

Si e trajtojnë zakonisht njerëzit disonancën kognitive?

Në dy mënyra themelore: ose zgjedhin t'i injorojnë faktet, për të mos hequr dorë nga bindjet e sjelljet e tyre ekzistuese ose i ndryshojnë bindjet e sjelljet në përputhje me faktet.

Mënyrën e parë rëndom e preferojnë njerëzit iracionalë ; të dytën, njerëzit racionalë.

Ajo që ndodhi me 24 shtator në Banjskë, e ka shkaku një disonancë të tillë kognitive në Bashkimin Europian.

Bindja e Brukselit se Serbia tanimë është bërë një shtet normal, një partner konstruktiv dhe i kujdesshëm për stabilitetin dhe sigurinë europiane, nuk përputhet me faktet e Banjskës.

Kjo BE- në e ka futë në stres të madh psikologjik dhe në paralizë të veprimit politik. Dhe, si në shembujt klasikë të trajtimit të disonancës kognitive, BE tash ndodhet mes dy alternativave të veprimit:  Ose ta ruaj bindjen e gabuar për Serbinë, që nënkupton injorimin e fakteve të Banjskës ose ta ndryshoj këtë bindje konform këtyre fakteve.

Injorimi  i fakteve nënkupton relativizimin e minimalizimin e tyre dhe shpërndarjen e barabartë të përgjegjësisë për to midis Kosovës e Serbisë.

Ndryshimi i bindjes nënkupton sanksionim të Serbisë për nxitje të sulmeve destabilizuese në Ballkanin Perëndimor dhe ndryshim të qasjes ndaj saj në çështjen e dialogut.

Në ditët në vazhdim do ta shohim se cila prej këtyre alternativave do të zgjidhet.

Fati i dialogut Kosovë - Serbi do të përcaktohet nga  ajo se cila nga këto alternativa do të zgjedhet për t’u bërë politikë zyrtare e BE-së.

Nëse zgjedhet alternativa e parë, do të kemi një riciklim të dialogut të deritanishëm, pra riciklimin e menaxhimit të deritanishëm të konfliktit, i cili herë pas here del nga kontrolli.

Nëse zgjedhet e dyta, atëherë mund të nis një format i ri i dialogut, i cili, kuptohet, duhet të ketë ndërmjetësues të rinj, që nuk punojnë me diplomacinë  e gjetjes së kompromiseve përmes koncentrimit të presionit tek pala më e dobët në tavolinë.

___________

Shkurt për konceptin "tokë e askujt".

Njihet si term qysh prej romakëve: terra nullius, tokë e askujt, tokë pa zot, pa pronar.

Në të drejtën zakonore shqiptare quhet "toke me ré".

Edhe në ligjin ndërkombëtar terra nullius përkufizohet si territor mbi të cilin nuk ushtron sovranitet asnjë shtet. E përkufizuar si i tillë territori i askujt e bën legjitim pretendimin e secilit që ka mundësi për ta pushtuar ose përvetësuar.

Në rastin konkret nëse veriu i Kosovës përkufizohet si tokë e askujt, atëherë del se përpjekjet e shtetit të Kosovës për ta vendosur autoritetin e vet atje, janë hiç më pak se një operacion pushtimi. Kjo në anën tjetër e legjitimon edhe e pretendimin e Serbisë për ta bërë të njëjtën gjë.

Në këtë kontekst, Rama ka zgjedhur një term të gabuar për ta përshkruar shkallën e lartë të rrezikut për shpërthimin e një konflikti të armatosur në veri.

Sepse duke dashur të alarmoj për këtë rrezik, termi i Ramës, me vetë domethënien e tij, mund t'i fryej edhe më shumë ndezjes së këtij konflikti.

Një analisti të pavarur mund t'i lejohet operimi me terma të tillë, por jo një kryeministri shteti i të cilit veriun e Kosovës e njeh si pjesë integrale të Republikës së Kosovës. Aq më pak kur ky kryeministër është i Shqipërisë

Unë besoj se sikleti i vetëm i Ramës nuk ka të bëj fare me ndonjë pabesi a tradhti ndaj Kosovës, por me frikën e tij se flakët e një lufte të re në Kosovë do ta përfshinin detyrimisht edhe Shqipërinë. Dhe si gjithmonë frika është këshilltar i keq: na nxitë interpretime dhe zgjidhje të pamenduara mirë.

___________

Në Serbi kriminelët që u kanë bërë të zeza kombeve të tjera, i arrestojnë të shtyrë prej zorit të madh, e jo pse duan t’i vënë para drejtësisë.

Arrestimi i Radojçiqit është i njëjtë si arrestimi i Millosheviqit, Karaxhiqit, Mlladiqit, e shumë të tjerëve nga banda e tyre nacional-socialiste.

Millosheviqin e patën rrëzu nga pushteti jo për shkakun e krimeve ndaj popujve të tjerë, por për shkakun se Millosheviqi dështoi në premtimet e tij për ta mbyllur shekullin e XX me krijimin e një Serbie të Madhe.

Edhe Radojçiqin e kanë arrestu me të njëjtin motiv: jo pse e bëri atë qe bëri në Kosovë, por pse dështoi ta bënte sipas planit dhe tani, për shtetin serb, ai është më i dobishëm në burg se në liri.

Prej kohësh drejtësia dhe shteti serb janë dy botë të ndara, me një hendek të madh mes tyre.

Dhe do të vazhdojnë të jenë të tilla, derisa shoqnia serbe nuk i gjenë forcat e nevojshme morale e politike për t’u çliruar njëherë e përgjithmonë nga obsesioni shovinist ndaj fqinjëve.

___________

Policët e Kosovës luftojnë në veri, ia zbardhin fytyrën Kosovës para gjithë botës, por paguhen keq.

Kuvendit të Kosovës, si sot, vazhdimisht i dështojnë seancat për mungesë kuorumi, sepse deputetët mungojnë në sallë, por të njëjtit paguhen shumë mirë se çdo zyrtar tjetër shtetëror.

Të parët të bëjnë ta duash më shumë atdheun e shtetin.

Të dytët ta gërditin edhe shtetin edhe atdheun.

___________

U gëzova kur e pashë Ramën në Zagreb! Me shpresën se kryeministri kroat Andrej Plenkoviq ia jep disa mësime të vlefshme mbi psiko-politikën e Beogradit. Sepse kush do që ta zbërthej me saktësi botëkuptimin politik që mbizotëron në Beograd, duhet të pyes kroatët dhe shqiptarët e Kosovës. E meqë Rama neve nuk po na beson, mbase kroatët e bindin.

___________

Te Muri Perëndimor i Tempullit të Dytë.

Këtu njeriu e kupton dhe e përjeton se çfarë do të thotë të mos e harrosh kurrë vendin e të parëve dhe shpresën se një ditë do të kthehesh për ta rindërtuar atë që ata të lanë trashëgim, por rrebeshet e historisë e rrënuan. Këtu njeriu e kupton se atdheu është dimension esencial, i patjetërsueshëm, i qenies së tij. I vetë përkufizimit të njerëzores.

___________

Në analet e historisë Ambasada e Kosovës në Jerusalem ka për t'u regjistruar si një nga vendimet ma të mençura të shqiptarëve.