Mihal Gjergji: Dita ime

Mihal Gjergji

DITA IME

Ndjej një dridhje telefoni

Edhe ngrihem me përtesë

Ndoshta më kujton vëllai

Ndonjë nip a ndonjë mbesë

Mbyll një libër, hap një tjetër

Në mes heshtjes, vetmitar

Më lëndon një plagë e vjetër

Që s’shërohet as në varr

Motrat rrinë me sytë nga udha

Jemi larg e s’dimë se ç’ngjet

Ballin e mbushur me rrudha

S’gjej pak vend ku ta mbështet

Dimëri me gishtrinjtë e erës

Më fton jashtë, të dal në dritë

Një maçok gërhet pas derës

Dhe më bëhet si muzikë

S’prehem dot mbi sup të ëndrrës

Ndoshta vijnë ata që s’janë

Mbase nëna feks mes territ

Mall e brenga bashkë t’i ndajmë!

Ja, kështu më erret dita

Soset jeta pak nga pak

Mes gjarprinjve prapë u ngrita

Këmbë njeriu rreth e qark!

Tiranë, Dhjetor 2023.