Xhemaledin Salihu: Shqiptarët, a po anojnë më shumë përkah përkatësia fetare ortodokse!?

Shqiptarët, a po anojnë më shumë përkah përkatësia fetare ortodokse!?

Shkruan: Xhemaledin SALIHU

Animi  i  Shqiptarëve kah perkatësia fetare ortodokse, euforia e madhe për kthimin e Shqiptarëve ortodoksë tashti në Maqedoni e rrënimi  apo harresa e katolicizmit ndër Shqiptarët është afrim kah sllavo-ortodoksizmi. Sikur po përsëritet e kaluara kur Pleqët dhe disa Hoxhallarë tanë thonin se Maxhupi/Romi/ për t’u bë mysliman i duhet së pari të bëhet Shka/Serb/ e pastaj Mysliman, sepse Myslimanët dhe Serbët i ndan vetem Maza/lëvorja e hollë/ e qepës.

Për mua këto nuk ishin të rastit, po e mbështes në një thënie të Gadafit, para vdekjes pat deklaruar se Islamizmi dhe ortodoksizmi sllav kanë një pakt të vjetër më se 200 vjet. Shume e vërtete, sepse ndodhitë e fundit në Lëvizjet fetare edhe ndër Shqiptarë po e vërtetojnë afrimin dhe dashurinë më të madhe të Islamit radikal ndaj Ortodoksizmit se sa ndaj katolicizmit. Sikur po bëhet një pakt dhe një dashuri e rrejshme, vetëm e vetëm të mbesin në errësirë Shqiptarët e Evropës.

Gjithësesi kjo na largon nga qytetërimi europian, të cilit i takojmë dhe jemi pjesë e saj.

Shqiptarët edhe në këto Lëvizje fetare, politike, ideologjike duhet të jenë syçelë, të anojnë kah Perëndimi, kah civilizimi europian, kah Amerika dhe Gjermania, si mik të përhershëm, por edhe mos ta harrojnë traditën dhe islamin sunit që e kultivuan më se 500 vjet. Devijimet janë katastrofike edhe fetare, edhe politike, edhe përkah perspektiva, sepse e kam një bindje se Demokracia e Perëndimit, ajo amerikane dhe gjermane nuk prek në substancën kombëtare, sikur po prekin disa zhvillime, kohëve të fundit ndër Shqiptarët e klerikët islamë duke trumbetuar islamizimin e gjithë myslimanëve, sikur ndodhte edhe në socializëm tendencat për një jugosllavizëm apo diçka tjetër.

Disa Hoxhallarë me të madhe po trumbetojnë për një etni islame e jo për Shqiptarizëm, me vetëdijë apo pa te, me qëllim apo pahiri, shpesh lutjet e tyre nëpër xhami nuk i adresohen Shqiptarëve myslimanë, edhepse xhemati është shqiptarë, por lutjet shkojnë në adresë të myslimanëve, nuk e besoj se në shtetet arabe islame kujdesen edhe për Shqiptarët. Pata raste të ndëgjoj,se nëse ndodh regjistrimi i popullsisë një numër i Shqiptarëve do të regjistrohen islam, përkah përkatësia kombëtare e jo fetare. Askund ndër disa klerikë myslimanë nuk ndëgjoj dhe nuk shkruhet për Rininë Shqiptare myslimane, por përmendet vetëm Rinia islame.

Trumbetimi i madh i fanatizmit fetarë islam, radikal, nuk ka të përbashkët me atdhedashurinë ndaj trojeve shqiptare dhe shqiptarizmës, këto të dyja përjashtohen njëra me tjetrën, sepse Vëllazëria fetare përjashton atdhedashurinë, patriotizmin shqiptar, bashkimin kombëtar, shkollën shqipe, gjuhën shqipe, gjithëçka që është shqip.

Andaj të kemi kujdes në këtë drejtim dhe mos të bijmë pre e lëvizjeve të shumta negative fetare, politike, ideologjike.

Me këtë shkrim jam i vetëdijshëm se do të ketë polemika, sharje, ofendime, përpara Ju faleminderit  për opinionet e Juaja negative apo pozitive.