Poezi nga Blerim Rrecaj

Blerim Rrecaj

MELODI E NDËRPRERË

Prag vere është

Zhurmë e rëndë e automjeteve

Shpesh ndërpret

Këtë këngë gjinkallash

SONTE NGA BALLKONI

Në këtë natë fillimvere

Hëna hedh pluhurimë drite

Edhe mbi reklamën: Exclusive Light

BUQETA KALLINJSH

Ec arës së korrur me grurë

Nëpër sërrnishtë shkrap-shkrup

Shkrap-shkrup

Dhe i dua këto buqeta me kallinj

Që si lule qëndrojnë në këmbë

MUZG FUNDKORRIKU

E purpurtë e mahnitshme qielli

E larë në ar

Më pëlqen po ashtu

Kur të sodis nga verandë e lartë

LULEDIEJT

Lulediejt që tërë ditën e lume

Morën rreze nga dielli

Tash këtë natë të lume

Marrin rreze hënë

Dhe pika drite nga yjet

LARG E LART

Lypeten madhështor e modest

Të shoh nga larg

Dhe më sheh

Dukshmëri e lartë e kësaj dite

Na magjeps

Na deh

VRANËSI VERE ME SHI

Nën dush

Kjo ditë gushti

Lahet e lahet

Shkumë shamponi

Noton mbi asfalt

NATË GUSHTI

Hëna dhe yjet

U kacavarën për qiell

Si lule nëpër vazo

Me litar e penj

Këndojnë bulkthat

E padukshëm

Fshehur nëpër bar

Fëmijët luajnë

Jo fshehtas

Por me top

Në mes arash

Në këtë livadh

SHKUNDJE

Pothuajse fundgusht

Natë

Dalim e shkundim

Këta drunj flokëkuqrremtë

Mbushur me trumcakë

PESHKU MBI ASFALT

Derisa fëmijët ndalin lojën

Për t’u dhënë ujë

Ca qeve të uritur

Pas një dite plot vapë

Një peshk i madh

Shfaqet i pikturuar në qiell

Ndërsa veturat nën të shkojnë me vrap

MALL PËR ÇASTE TË SHKUARËS

Ndonjëherë

Të merr malli

Për çaste të shkuarës

Si për këtë copë dite

Qiellhirtë vere

Ku nga çasti në çast

Pritet të vije shi

Për të prekur murin e xhamtë

Të këtij kati të epërm restauranti

Me një kënd mozaiku lojërash

Për fëmijë