Qazim Shehu: Shami e erës

SHAMI E ERËS

QAZIM SHEHU

Kumti memec gjuhëprerë djeg spec

Në ndjesi; i erës dinake  që fluturon si shami

Hapësirës paranonjake.

Fluturon era mbi kufij shtetesh

Hyn e del dhe shaminë e saj

E vë mbi fytyra të vdekurish

Vrarë nëpër kufij,  pa faj…

STATUJAT

Jeta është më e bukur pa to,

Veç pa statujat s`na rrihet,

Në udhëkryqe,sheshe ngado

Ato ngrihen.

Mes dilemës ,vendosmërisë

Si e gjetën shtegun,

Duke ia bërë me hile historisë,

Me pashaportë të hekurt.

Ndonjëra që hyri pa vizë

Dhe në shesh zuri vend,

Më  shumë po i pëlqen  historisë

Dhe  hilen e saj ajo gdhend…

MË DUKET…

Si mund ta shpëtosh a strehosh poezinë

Në një zemër që i ruan ritmet e kohës,

Kur mbi çdo gjë bie hija gri e prozës?

Kur secilit i shkon mendja për lavdi

Në këtë kohë irracionale,

Më duket po troket veç për poezi

Lufta finale…

DASHURIA

Sikur dashuria të shpërndahej si lajm,

do e këndoja si psalm,

Si një përshpirtje plot rrënqethje

Në këtë botë përvëluar në ethe.

Kaq lajme ka sa një lam për të

S`do bënte ta kthente kokën kush,

Prandaj e themi nën zë,

Dhe zemrën me gjak na mbush.

Nëse do e përhanim si lajm,

Pyllin e thatë të ndjenjave

Do  gjethëronte si psalm…

ZOTAT

Zotat e Olimpit na dhanë shëmtinë

Që urtë para tyre të rrimë.

Para se të na dhuronin atë

Bukurinë na morën dhe jetën

Që na lë.

Këtë nuk e kuptuam mijëra vjet

Përderisa zotat adhuruam dhe shëmtinë e tyre

E kthyem në shenjt...