Qazim Shehu: Rozafa

ROZAFA

 

NGA QAZIM D. SHEHU

 

Themelet murosën një Rozafë,

Rozafat mbollën sakridashuri…

Një gjerdan me hipokrizi

Jeta e mbajti në qafë.

Ia vlen themele të mos ngresh,

Sa të përsërisësh këtë gafë…

 

 

VERBËRI

 

Ecën verbëria,

Botën zhbën,

Thellë e më thellë,

Sa thellësia harron

Se është hellësi.

Atje merr një sy…

 

 

SAHARA

 

Hoje mjalti të hidhur,

Thurur kodesh tingujthinjur,

Biem në grackë të parasë,

Do thoja :dashurisë…, po më falni,

Dashuria po i afrohet Saharasë,

Me ëndrra lëndinash të largta…

 

 

KUSH DO RËNKONTE

 

Të shkulja gishtin ta bëja shigjetë,

Pse gishtin?

Qepallën për turpin,

Hundën për shijet,

Buzën për një puthje.

Në këtë çmenduri,

Vetëm zemrën s`do guxoja të dhuroja.

Kjo nuk shkonte.

Kush për mua do rënkonte?

 

 

SHËMTIA

 

Krahët nuk ia hoqën fluturës,

Për ta kthyer në krimb,

S`guxuan njerëzit më të ulët,

As perënditë në Olimp.

Atëhere ç`është kjo shëmti

Që rend e shfryn si e marrë?...

Flatrat fluturojnë në fantazi,

Hapim sytë dhe flatra s`ka…

 

 

GURI

 

Në qiej kujtimesh të fikura,

Kërkoj emrin e gurtë,

Kur nata bie ,ti vjen,

Hap dritaren, ikën përsëri,

Një gur mbi gjoks më vë,

Drithin  e ëndrrave me të të bluaj,

Por unë nga vendi dot s`e luaj…

 

 

HARK

 

Krahët e erës shqyen

Gojën e gjethes.

Ngjyrat e vjedhura,

Erren.

Shkartisen zëra,

Dita nuk i pa.

Brilante të zhvlerësura

Në konto të mëdha.

Një hark triumfi u ngrit,

Nga dëshirat,

Të kalojnë lotët,

Gatuar nga zërat…

 

 

KËMBËKRYQ

 

Tani nuk ulesh më këmbëkryq,

Fjalës nëntavolinë e kurdis.

Lëviz këmba drejt këmbës tjetër,

Dora drejt dorës bëhet dhelpër.

Në duarshtërngim hileqar,

Marroset një diell tradhtar.

 

Tani nuk ulesh më këmbëkryq,

Fjala pushkatohet pa gjyq.

Qyqon e qesh  qesharakërisht,

Mbi tovalinë buzëqeshje miqsh..

 

 

KITARA

 

Mbrëmja shtrihet në telat e një kitare,

Serenatë korçare.

Thërret trokth kujash prej flake,

Zërin e Lorkës prej Granade.

Përvidhen zjarret,

Nën hije idhnake.

Në largësi ndizet dashuria,

Kitara qan.

Fjalët bëhen gjethe,

Gjethet fjalë…

 

 

ZOGORI QENSH

 

Koha futet në kohë, del,

Trëndafil kthyer në ferrë,

Ferrë në trëndafil

Kohën e shkuar s`e shikon.

Për të mos u prishur mendsh.

Për të shpëtuar prej saj,

Nxjerr të flasin për të,

Një zogori qensh…