Nebi Dragoti: Vaçe Zela

VAÇE ZELA

Esse

NGA NEBI DRAGOTI

Vaçe Zela simbol i këngës shqiptare, plot fllade dehëse e rrënqethëse melodish joshëse do të jetë ndër breza jete, ninulla rritëse djepesh në lindje agimesh dhe ëndërrash plot rrezatime kulmesh muzikore, zë kultivues i optimizmit njerëzor, që ngre dhe mbanë zemrat peshë. Vaçe Zela zë elektrizues me intensitet të lartë influencon në ndjenjat më sublime si ushqim patriotizmi, atdhedashurie, identiteti dhe krenarie kombëtare. Mburremi me këtë zë. Vaçe Zela zë i paparë, i papërsëritshëm, me vibracione të mahnitshme rrjedhëse mërmërimash, gurgullimash si uji i kristaltë i shkumbëzuar plot reflekse që zbret nga mali drejt fushave e livadheve erë trëndeline, luleshumëngjyrshe që, metaforikisht, jep jetë, jep vrull, jep forcë pune për ta bërë jetën akoma më të bukur. Kënaqësi ta nisësh punën duke dëgjuar këngë nga repertori i saj. Vaçe Zela talent i paarritshëm i tokës shqiptare, ylli muzikor me më tepër shkëlqim, ylli kombëtar që të mahnit me zërin e paparë lirik dhe origjinal shfaqur me plot nuanca e vibracione notash të një muzike me një natyrshmëri të thekshme si vetë natyra e bukur shqiptare. Krenaria idhullore dhe maja më e lartë e muzikës sonë, është kjo, lushnjarja, Vaçe Zela, që fizikisht u largua nga ne përgjithmonë (qetësi e paqë paste në varrin ku prehet), ndërsa artistikisht me zërin e saj qëndron këngëtare e gjallë dhe plot finesë e përjetësuar mes nesh përgjithmonë. Me tekste këngësh lirike, me tekste këngësh epike ndezi me zërin e saj një flakadan madhështor në jetën artistike. Ka bukuri magjepse zëri i bilbilave nëpër korije, lëndina e pyllnaja, gjer në mallet me bore, por zëri i Vaçe Zelës ua kalon gjithë bilbilave, sepse me gjuhën e bukur shqipe u këndon bukurive të vendit, i këndon jetës, u këndon shqiptarëve, i këndon Shqipërisë.