Kostaq Duka: Vizatime në “Qytetin e erës”

Kostaq Duka

Vizatime në “Qytetin e erës”

-Triptik-

Nën “pushtimin” gri

Prej liqenit

a prej qiellit të plumbtë

u ngjyen rrugët, fasadat e grataçieleve ,

pardesytë e palltot e njerëzve supembledhur

që me erën shkëmbejnë thashetheme pa fund?!

Chicagoja

nën pushtimin gri.

Hijerëndë, më shumë se trishtim

trajtëson frikshëm - madhështi.

Një grua…

Një grua

nën pallton e zezë,

çapitet si një hije buzë liqenit-det

shkumbëzuar në valë zemërimi……

E vetme,

larg lëvizjes marramendëse,

shuan me liqenin

pikëllimin.

Në pritje të dekorit të ri

Qyteti i erës

e flaku tej dekorin e blertë.

Degët e pemëve dridhen

si fëmijët jetimë lënë rrugëve.

Njerëzit u hedhin vështrimin me dhëmbshuri,

në pritje të çastit kur ato të mbështillen me mantelin farfuritës të dritave.

Chicago, Nëntor 2011