Dy parod nga Demir Krasniqi

Dy parodi:

KY NUK BANË – AI NUK BANË

Prej se u linda dhe u rrita –

Një refren dëgjoj çdo dita !...

M’ irriton , më neveritë ,

Ma shpon zemrën dhe mushkëritë ...

Këtë refren, që është bërë “modë” –

E dëgjoj n’ zyrë, n’ rrugë e  n’ odë ...

Përgojohen t’ gjithë me rend –

Që nga lagjja deri n’ Kuvend !...

Njeri t’ mirë mbi tokë nuk lanë –

Ky nuk banë – ai nuk banë !

Ky i keq – ai i marrë ,

Ky spiun – ai tradhtarë !...

Ky refren, kudo jehon –

Ky nuk di – ai s’ meriton !

Ky hajduk – ai kopuk ,

T’ gjithë luftojnë veç për kolltuk !...

Dal e rri n’ kafeteri –

Ku bërlykën pleq e t’ ri –

S’ mbetet kush pa u marrë për gojë ,

Për këto punë kem shumë përvojë !

As në shkencë, as n’ histori –

S’ mbet i mirë, plak as i ri !...

Duke pirë  kafe e raki –

Ma t’ mirët mbetëm :UNË dhe TI!

MOS RRI ME KËTE – MOS FOL ME ATË

Janë do burra këtu ndër ne ,

Që s’ duan komb, as s’ duan Atdhe ,

S’ njohin Zot, as s’ njohin fe ,

S’ dinë pse rrojnë , as pse kanë le !...

Për veti nuk  kanë boll mend  –

Dinë për t’ mësuar tjetër kënd !

Përçajnë njerëz këtu e atje –

Mos rri me këtë – mos fol me atë !...

S’e duan motrën , s’e duan vëllain –

Vet – vetit po ia thyejnë krahun !

Nuk duan shokë, as nuk duan miq ,

Nuk duan farë, as nuk duan fis !...

Edhe tokës i bëjnë hata –

Ma marri për burrë a ka ?

T’ thyejnë me djalë e t’ thyejnë me vëlla –

Mos rri me ata – mos fol me këta !...

More i mjerë,  fytyrë marruar ,

A ti do  dike për t’ mësuar –

Me kënd t’ flet e me kënd t’ rrijë ,

Me kënd t’ hajë e me kënd t’ pijë ?!

Merre veten me të mirë –

Pshurru n’ tokë – këqyru n’ pasqyrë !

Mos jeto me gajle t’ huaja ,

Se bien n’ dergjë e t’ kapë sëmundja !...

Gjilan, më 27.12.2010.

Demir KRASNIQI