Sabile Keçmezi-Basha: Këtë duhet parë

Sabile Keçmezi-Basha

Sabile_basha@hotmail.com

KËTË DUHET PARË

(Vajzës  sime)

MË THOSHE

Më thoshe

Atje ku shkon ti

Është festë për zemër

Fluturat qelin lule

Fontanat shpërlajnë

Mëkatet globale

Vrushkujt e ujit

Bien në dashuri

Me hijet e demave

Më thoshe

Piktoret pikturojnë

Dëshirat e çmendura

Të toreadorëve

Në veranda prej metali

Thënë të drejtën

Deri diku të besoja

Më thoshe

Në Ak-Barin fantazmagorik

Përdridhet ëndrra

E pa ëndërruar

Korbi i Lorkës

Të flenë në qepallë

Të besova

Po ti ku ishe

Kur të kërkoja

Rrugës La Rambla

ku skulpturat e gjalla

Animonin jetën

Në njëmijë e një pamje

KËTË DUHET PARË

Më the

Këtë duhet parë

Dhe gjithsesi

Duhet të ishe hije

E kipcit tim

Vogëlushja ime

Që të jesh me mua

Lëkurë të mbaja

Në shuplakat e djegura

Duke të treguar

Se këpuca e qorton këpucën

Për ecejaket e tepërta

Bëhem nervoze

Se më mungon

Ëndrra e lulet

Nga flokët e tua

Dhe flutura mbi buzë

Që përcjell mesazhin

me yje galaktikë

vogëlushe prej dielli

KUDO JE ME MUA

Kudo je me mua

Edhe me erën

Kudo je me mua

Edhe me ëndrrën

Kudo je me mua

Vogëlushe prej ëndrrave

Duke të treguar

Përrallën për Gaudin

Në Sagrada Familia

PSE S’JE ME MUA

Siluetën time

Pengë ia lash diellit

Nëpër botë

Çadrën e grisur

E përdora

Të mbrohem nga rrufet

Dhe për Ty

Ëndërroja

Zot, o zot

As një grimë

Nuk më dhimbset

Pse gjinkëllon gjinkalla

Në folenë e qyqes

E kur jam larg

Nuk e vëngërojë

Se shpella e akullt

Banon në kafkën e paformuar

Të atdheut të premtuar

Dhe edhe më tej

Ti je me mua

7.08.2010, Barcelonë

Ç’TË BËJË ME KUJTESËN

E me kujtesën

Ç’farë të bëjë

Që mos të ma shkërmoqin

Ardhacakët e harruar

Ti nuk e di se

Historia e historisë

Ka fillua

Shumë më herët

Se sa vet lashtësia

Nuk ka memorie

Në arkat e atdheut

As obeliskë

Kujdes

Këtu kanë kalua

Çobanë me ngjyra-hije

Dhe kanë mbarsur netët

Me ëndrra të trishta

DEKLARATË

Atdhe

Të dua

Dhe më fal që të dua

Se kur jam larg teje

Nuk jam vetvetja