Poezi nga Naser Aliu

Naser Aliu

Pusi grek

Pika-pika mbushet pusi

do të mbushej

sikur të mos rrinin pranë

politikanët

me kova në dorë!

Rrena

Rrena i ka këmbët e shkurtra

kudo në botë

në Ballkan

gënjeshtra ka këmbë të gjata!

Dardha e vrenjtur

Dardha pikë nën dardhë

jo te ne

në Ballkan vidhet

para se të pikë!

Shkallët

Nëpër shkallët, që u ngjit

duke u nuhatur pas

me mundime e dalldi

nuk zbriti poshtë

Nga shtyrja e lehtë, e beftë

u plandos rëndë, e sigurt

dhe, nuk u ngrit më...

për fat, kishte shtypur hundën!

Shqiptari

I lutej Zotit

për punë që nuk dinte t’ i bëjë vet

për shembull shiun

për të tjerat

merrej vesh me Lekën

për ditë!