Ndue Dedaj: Shkolla e Shën Jozefit

SHKOLLA E SHËN JOZEFIT PUNËTOR

- në ditën botërore të librit -

NGA NDUE DEDAJ

Shën Jozefi, kryekrejet na kujton punën, që aq shumë është zvetënuar në vendin tonë. Kurse shkolla rajonale në emrin e tij, në Rrëshen, modelin se si punohet në një institucion edukimi parauniversitar, ku marrja e njohurive shkencore e teknike gërshetohet bindshëm me praktikën profesionale. Falë dhe bashkëpunimit të vazhdueshëm me institucione të ngjashme etj. në Itali, Gjermani dhe Kosovë.

Pata kënaqësinë të isha i ftuar për të folur me nxënësit e kësaj Shkolle në ditën botërore të librit. Veprimtaria e organizuar nga mësuesit e letërsisë dhe nxënësit me këtë rast ishte përmbajtësore dhe pa duk. Sepse e tillë është filozofia e kësaj shkolle, mëso dhe puno. Biblioteka e saj është e shpërndarë gjithandej, në sallon, në krye të shkallëve, në sallën e madhe të takimeve. Libri është në sy, ne mjedis të hapur, duke e “ngacmuar” çdo çast vëmendjen e nxënësve. Aq me tepër kur leximi nuk është si dikur. U fol thjeshtë e qartë, pa moralizime nga askush për rëndësinë e të lexuarit, u shfaqen përmes ekranit shpalime për librin, leximin, shkrimtarët, u kryen inskenime pjesësh artistike, u dëgjuan recitime, iu përgjigjëm pyetjeve të nxënësve, që ishin protagonistët e veprimtarisë. Bashkëbisedimi ynë me nxënësit u fokusua kryesisht te problematika sociale "Libri dhe interneti". Gjithçka, me dëshirën që të rritet numri i kartelave të lexuesve...

Gjimnazi i Rrëshenit, Shkolla e Mesme industriale i Rubikut etj. janë shkolla të historisë moderne të arsimit në Mirditë, me një kontribut të jashtëzakonshëm në rrafshin lokal e rajonal, që kanë mbushur universitetet e vendit, por dhe të huaja, me studentë ekselentë të të gjitha degëve, etj. Shqipëria ka pasur një arsim profesional tejet të konsoliduar, pedagogjik, mjekësor, mekanik, ndërtimi, ekonomik, pyjor, veterinar etj., por që tranzicioni e zhbëri. Shkolla jopublike “Shën Jozefi Punëtor”, që ka vetëm 15 vite (krijuar mbi bazën e qendrës së mëparshme profesionale), sot me më shumë se 400 nxënës, duket se është “thirrur” për të shënuar një etapë të re të arsimit profesional në këtë rajon (Mirditë, Lezhë, Kurbin), duke dëshmuar prirjen e të rinjve të sotëm nga zanatet, profesionet, punësimi etj.

Ka dhe një traditë të “shkollës së kishës”, që është përpajnuar nëpër shekuj. Nëse kthejmë sytë mbrapa vetëm një çast për të kunduar në histori, bash në këtë rajon kemi shkollat e para shqipe dioqezane, Kurbin, Velë, Pllanë etj. në shekullin XVII, që kulmojnë me Noviciatin e Rubikut, në vitin 1898, që ishte në nivelin e arsimit të mesëm.

23 Prill 2024