Blerim Latifi: Kur një popull zhduket me një të rënë lapsi

Kur një popull zhduket me një të rënë lapsi

Nga Blerim Latifi

30 Janar 1923. Në Lozanë të Zvicres Turqia dhe Greqia arrijnë marrëveshje për shkëmbimin e popullatave dhe pronave të tyre: Grekët e Anadollit do të shpërnguleshin në Greqi, ndërsa turqit e Greqisë në Anadoll. Me një të rënë lapsi të gjithë shqiptarët muslimanë të Çamerisë u futën në kategorinë e turqve dhe fati i tyre u vulos përgjithmonë. Askush nuk u gjet aty për të protestuar kundër këtij kategorizimi etnocidal, ndërsa sot Çamëria është veç një toponim historik, ku të vetmet shenja të shqiptarëve të saj janë emrat e fshatrave që më nuk ekzistojnë, aty këtu ndonjë gërmadhë dhe varret e mbuluara nga vegjetacioni i egër. Dhe "Balada Çame" e Bilal Xhaferit, mbase poezia ma rrënqethëse që dikush ka mundur ta shkruaj për një popull të dëbuar nga toka e tij:

"Pas shpinave tona përplas tufani dyert e shkallmuara të shtëpive.

Dhe rrugët zgjaten e zgjaten në veri.

Ne, popull muhaxhir, ecim nëpër shi...

Lamtumirë, Çamëri!"

_________

Sa herë kaloj në këtë rrugë ndalem para tabeles që mbanë emrin e saj. E ndezi një cigare dhe kthehem pas në kohë. Bashkë me Xhemshirin ishim në Luftën e Kosharës dhe kush e di sa herë i thonim njëri tjetrit se bashkë do të ktheheshim në vendlindje.Ai kishte vite të tëra larg familjes dhe mallin e kishte shumë herë më të madh se timin.Por lufta është mizore, e nuk pyet për ëndrrat dhe ndjenjat njerëzore.Xhemshiri mbeti atje, mes Maleve të Kosharës, dhe rruga, të cilën ëndërronte ta shkelte në Kosovën e lirë, sot mbanë emrin e tij. Dhe derisa e lë pas tabelën, më vjen ndërmend Hymni i Fishtës për dëshmorët e lirisë:

O ata t'lumtë që e dhanë jetën!

O ata t'lumtë që e shkrinë vetën!

Lehtë u kjoftë mbi vorr ledina,

Butë u kjofshin moti e stina.

E der' sa t'knoj n'mal ndoj zanë,

Der' sa t'shndrisin diell e hanë.

Ata kurrë mos u harrofshin,

N'kangë e n'valle por u këndofshin.

_________

Një nga shkaqet pse në mesin e viteve nëntëdhjetë disa djem vendosën t'i rrokin armët kundër Serbisë, ishin edhe skenat e rrahjes së shqiptarëve nëpër stacionet policore. Ishin skena të ngjashme në pamje me këtë rrahjen e këtij djaloshit nga një polic i Kosovës: u thoshin të rrinin gatitu, pastaj një polic i godiste dhe policët e tjerë aty rrinin në rolin e spektatorëve që dëfrehen me dhunën.Nuk ka asnjë dyshim se Policia e Kosovës në radhët e saj ka shumë njerëz që uniforma dhe revolja në brez i bën prepotent e agresiv. Ashtu siç nuk ka asnjë dyshim se shumë raste si ky me këtë djaloshin heshten dhe fshihen nga publiku.Pamje të tilla një efekt e kanë të sigurtë: vazhdimin e rënies së besimit në shtetin e Kosovës. E kur ky besim shembet, njerëzve u mbetet veç një alternativë: t'i marrin rrugët e botës!

_________

Edhe në Suharekë ja paskan krisë alltijave në një tubim elektoral.PDK është duke gabu tepër shumë që po lejon gjuajtjet me armë nëpër tubime elektorale.Mesazhi i këtyre pamjeve është brutal, retrograd, jodemokratik, jocivil dhe, në fund të fundit, elektoralisht vetëvrasës.

_________

Një gjë e bukur dhe me vlera të mëdha në këto ditë të mbushura me thashethemnajë elektorale dhe me zymtësi të pandemisë që duket se kurrë nuk do të largohet. "Problemet e filozofisë", njëri nga librat më të mirë të filozofit të famshëm britanik, Bertrand Russell, tanimë edhe në shqip. E sa për politikën Russell shkruante: "Politika ka të bëjë më shumë me tufat sesa me individët, dhe pasionet që janë të rëndësishme në politikë janë, pra, ato në të cilat anëtarët e ndryshëm të një tufe të caktuar mund të ndjehen njësoj".