Alketa Stefania Caca: Ditar jetim

Alketa Stefania CACA

DITAR JETIM

Dita ime, jeshile e lodhur,

dielli më ka kthyer kurrizin,

deti ka rënë në humnerë,

grimca fjalësh në sherr me dallgët e tij.

Gjumë lakuriq në krahët e një korbi,

tik - taku i thatë i natës - ditë

ngjan me epshin e fluturës,

zgërdhihet para vdekjes,

sikur të fton në krahët e lumturisë.

Vrapoj me hapin e psherëtimës sime,

të shpëtoj sytë e mbyllur shuk,

si letrat e zhubrosura të Pushkinit,

si dashuritë e mjegullta në dimër e vjeshtë.

Ditari im sot u ndje jetim,

asnjë laps, gishtat u mpinë,

shkronjat brodhën kuturu

në frymë të plasaritur...