Adem Zaplluzha: Një grusht dashuri

ADEM ZAPLLUZHA

Një grusht dashuri

1.

Një grusht dashuri

Në shpirtin e gruas

I shkrin kallkanët

2

Mbi shpatullat e stinës

Rri vjeshta

Dimri hyri në shpirt

3.

Një lule buzëvarur

I hapi petalet

Përpiu  mjegullën

4.

kallkanët në çati

i mëkojnë

Zogjtë e pranverës

4.

Një zog në fluturim

I pyet mjegullat

Për rrugën e qumështit

5.

Kur trishtili

Zgjohet i trishtuar

Stina veç përfundon

6.

Kur përdridhet plepi

rrënjët çelin

Lule të zeza mimoze

7.

Nëse arrin

Të bisedosh me rrënjën

Shndërrohesh në lule

8.

Në shpirtin e vaut

lahet nate

Yjet xhelozojnë njëri tjetrin

9.

Kur vdes njeriu

Arkivoli bisedon

Me dhëmbët e tokës

10.

Kur mjegullat

Mashtrojnë ylberin

Sërish lind dita

11.

Në këtë degë molle

Paske mbetur peng

Puthja e Evës

12.

Nga dritarja ime

Në gjumin e ëndrrës

Hyri hëna