Elida Buçpapaj: Trushplarësve

TRUSHPLARËSVE

Poemë nga ELIDA BUÇPAPAJ

 

ndër shqiptarët

nuk ka

liri të fjalës

 

ka liri të plotë

të trushplarjes

si e doni trushplarjen

oferta të trushplarjes

ka plot

në çdo sezon

janë zemërgjërë

trushplarësit

lavatriçet

janë të markave

më të fundit

 

ndër shqiptarët

nuk ka liri fjale

ku fjala shqipe të

gurgullojë lirshëm

nga burime drite

 

festohet tallshëm

nëpër gala

me maska

ditërrëzimi

i statujave

festohen tallshëm

përvjetorët

e lirisë

të trushplarjes

 

sepse fjala

është e prangosur

më keq se të burgosurit

politikë të

ndërgjegjes

në kohën e shqiptarofobisë

apo kur shqiptari

e vriste shqiptarin

me armë të shfarosjes

veç sepse ishte i armatosur

me mendime

të ndryshme

nga sloganët

uniformë

si uniformat

e lagerave

me vija dhe me një numur

në vend të emrit

 

ndër shqiptarë

nuk ka fjalë të lirë

që të fluturojë si zog

zemër më zemër

në vend të tyre

ka sorra jeniçere

me zë të çjerrë

që ta gërryejnë

shpirtin

 

ndërsa

fjala e pafrymë

përpëlitet

duke i provuar të gjitha llojet

e ekzekutimit makabër

në dukjen e mosdukjes

abstrakte

nga xhelatët

e shekullit XXI

që shfaqen në ekranë dhe kopertina

gazetash

si personat

më të rëndësishëm

të Ballkanwood-it

shqiptar

rrethuar nga shpurat

gollomeshe

të vulgaritetit

 

dhe tutorët dhembfloriri

pronarët-xhonglerë

të cirkut politik

prenë e tyre

e zgjedhin

duke ua kontrolluar dhëmbët

e dhëmballët

si në tregun

e skllevërve...

të mileniumit të tretë

 

kur dhembët e qenit,

apo prerës nuk e

përtypin aq sa duhet

fjalën

nuk e coptojnë

ashtu si duhet për t’ia

hequr shpirtin

dhe rrënjësisht kuptimin

apo kur

kurorat dhembore

nuk bëhen dot

burg i sigurt

për fjalët

atëherë

tutori permes

xherahëve

të shkolluar në Perëndim

ua çrrënjos dhembdhëmballët

një për një

dhe pastaj ua mbjell

një për një

duke marrë garanci

se tash e mbas

nga gojët

e dhembdhëmballëçrrënjosurëve

dhe dhembdhëmballëmbjellurve

nuk do të ketë asnjë lloj hapësire

për të rrjedhur

asnjë fije floku

të fjalëve

asnjë rrokje

asnjë presje

bile asnjë pikë pikë pikë

retiçense…

 

ndër shqiptarët

nuk ka

liri të fjalës

 

ka liri të plotë

të trushplarjes

si ta doni trushplarjen

ka oferta me çmime

konkuruese

që trushplan

në çdo sezon

 

janë zemërgjërë

trushplarësit

të pakursyer

për të blerë

lavatriçe

të markave

më të fundit…

 

29 dhjetor 2013