Qazim Shehu: Netët Korçare të Poezisë

Netët Korçare të Poezisë

Nga Qazim Shehu

Edhe sivjet më 15, 16 qershor u zhvilluan në Korçë Netët Korçare të Poezisë, një manifestim tradicional, nën kujdesin e bashkisë së Korçës dhe të Skënder Ruit si dhe të klubit të shkrimtarëve Bota e Re.Ky manifestim , tashmë tradicional, në mes të qershorit dhe të një vape që rifilloi shpejt, solli freskinë e poezisë e cila për dy netë ,rrodhi përmes vargjeve të freskët si një rrjedhë kristali nga ambientet e hotelit Kristal, majë kodrës, duke përcjellë frymën dhe ajrin që jep poezia.Tubimi i poetëve ardhur nga vise të ndryshme shqiptare , nga Maqedonia, Greqia, nuk qe veç një festë e cila për organizatorët , por edhe pjesëmarrësit do kalonte shpejt në magjinë që krijojnë vetiu bisedat, prezantimet, njohjet, recitimet intervistat, debatet dhe mendimet e ndryshme të cilat mbajnë brenda pyetjen:ku po shkon poezia?

Sot, në saj të internetit, nuk është e vështirë që poetët ta njohin njëri tjetrin virtualisht, nuk ka vështirësi leximi, as komunikimi, por do të thoja , asgjë , sado e përparuar qoftë, nuk e zevendëson kurrë njohjen direkte , bisedën e gjallë, të gjitha të tjerat janë vetëm në funksion të saj.Prandaj takime të tilla janë të domosdoshme, dhe përcjellin një besim se edhe në kohë të vështira, poezia e gjen rrugën drejt zemrave, edhe në kohën e çoroditjeve sociale, apo të indiferencës së leximit nga ç`pritet, ajo, poezia ,nuk dëshpërohet, përkundrazi shkruhet më shumë dhe bën përpjekje për madhërimin e formave sofistifikimin e tyre, thellimin e ideve, etj.

Korça ëshë një djep që ka nxjerrë poetë të shquar si Dritëro Agolli, Koçi Petriti, Vangjush Ziko, Skënder Rusi, por edhe poetë të tjerë, e kanë sajdisur këtë sofër të fjalës si Rajmonda Moisiu nga Amerika, Edmond Shallvari nga Selaniku,Istref Haxhillari ,Bujar Balliu, Eduard Sulollari nga Pogradeci; Bashkim Gjoza ,nga Devolli;Nikolla Spathari, Agim Bajrami, Sami Velçani, nga Durrësi, Fatmir Musai, Beatriçe Balliçi, Lida Lazaj, nga Elbasani, Agim Mato, Bardhyl Maliqi, nga Saranda;Xhelal Tosku nga Rrogozhina, Fatos Rushiti nga Kumanova,Kalosh Çeliku dhe Saida Bogoviç nga Shkupi, Resul Shabani nga Struga,Myrteza Mara nga Vlora;Demir Gjergji , Qazim Muska,Sinan Kërpaçi, Qazim Shehu, nga Tirana.

Duken të gjithë si delegatë dhe të porositur nga viset e shpirtit të tyre për të thënë fjalën në këtë manifestim i cili e kurorëzon atë përmes ngjyrave të shpirtit njerëzor dhe magjisë që jep vetiu poezia.E veçanta e takimit të sivjetëm ishte se ky manifestim u krye në ditët e fushatës elektorale,dhe pavarësisht borive të saj ose slloganeve shurdhuese që përcjell vetiu ajo, ky aktivitet u përcoll edhe nga dashamirës të poezisë dhe nuk e prishi rendin e tij, për të treguar se jeta nuk është fushatë edhe pse partitë politike e trumbetojnë atë.

Pastaj, krahas poetëve që vijnë pothuajse çdo vit, që janë bërë të përhershëm, shikon edhe poetë të rinj,që vijnë edhe nga Greqia, enkas, siç është rasti i Brikena Qamas,dhe nga viti në vit kjo veprimtari po e zgjeron rrethin e përfshirjes të sa më shumë poetëve në të.Manifestime të tilla bëhen në të gjitha trojet shqiptare duke shërbyer edhe si guida turistike, ato mund të bëhen më shpesh dhe të reklamohen më shumë, kjo do të sillte një afrim më të madh të mundësive për ta perceptuar poezinë në shumëllojshmërinë e saj, sepse , për hir të së vërtetës ,këto takime inspirojnë që të shkruhet poezia sa më cilësore, duke sjellë motive dhe këndshikime të reja.Por edhe duhen promotorë të zellshëm që të hartojnë projekte, të bindin mekanizmat e pushtetit lokal, të afrojnë donatorë, dhe një i tillë është Skënder Rusi në Korçë, po edhe Nikolla Spathari në Durrës.Nikolla Spathari e organizoi Pranverën Poetike Durrsake, vetëm me donatorë, duke ndërtuar një veprimtari mjaft të bukur. Gjithnjë mundësitë gjenden, mjafton të  jenë dëshirat dhe mos lihen gjërat në kufijtë e spontaneitetit.Krahas deklamimit poetik, pjesën më të rëndësishme e pati debai për poezinë.Çështje të tilla si:tradita dhe modernia në poezi, pse nuk reklamohet poezia, raporte të kritikës letrare me librin, hutia e vlerave përballë antivlerave, reklama dhe media, një spostim i vëmendjes nga poetët e vërtetë, natyrisht nuk e dekurajojnë faktin se poezia bën jetën e saj , se këto janë faktorë ndihmues kurrë prezantues dhe përcaktues, se poezia duhet të lexohet nga poetët së pari pasatj nga lexuesi e më gjërë.Kjo pjesë e aktivitetit ku diskutimet u përfshinë herë herë në kakofoni ideshë dhe ripërsëritje të panevojshme apo udhëzime prej tribunës, pati një të mirë se e shtriu efektin e saj edhe në diskutime jashtë , pas mbarimit.Poetët diskutojnë mbi poezinë, flasin hapur lexojnë japin mendime dhe natyrisht koha shket drejt fundit, kurorëzimit të aktivitetit.Para hotelit, në një kodër poshtë të cilës prushërojnë shtëpitë e qytetit nga dritat,do të lexojë poezitë e veta çdo poet për të garuar në startin e çmimeve.

Dhe çmimin “Asdreni” e merr Qazim Shehu, çmimin “Dritëro Agolli”, Nikolla Spathari,me çmime specialë vlerësohen poetët Agim Mato, Bardhyl Maliqi, Myrteza Mara, Fatmir Musai, Lida Lazaj, Beatriiçe Balliçi, Qazim Muska, Kalosh Çeliku.Pema për këtë vit u mboll për poetin grek Dino Kubatis, i cili ka bërë shumë në johjen e poezisë shqipe në Greqi.Muzika, recitimi vazhdojnë deri vonë.Poezia si gjithnjë e zhvlerëson mërzine e kohës dhe ia humb efektet lodhjes…