Ramiz Selimi: Promovime librash të shumtë dhe takime krijuesish

Një ditë promovuese në Vjenë e organizuar nga Shoqata Kulturore “Aleksandër Moisiu”

Promovime librash të shumtë dhe takime krijuesish

Nga Ramiz Selimi

Hapësirat e Ambasadës së Republikës së Kosovës në Vjenë janë kthyer në një objekt kulturor për krijuesit dhe artistët shqiptarë në Austri. Ato hapësira ishin të vogla për të pranuar të gjithë krijuesit në promovimin e librit “Illyricum”, por njëkohësisht ato ishin ambiente shumë të ngrohta, duke krijuar një atmosferë të ngrohtë letrare. Në këtë përurim në Vjenë, merrnin pjesë pos autorëve të librave, edhe krerët nga organizata e shoqata, aktivist dhe veprimtarë të dalluar të komunitetit, biznesmen, avokat, intelektualë, student, gazetar dhe njerëz nga jeta politike, kulturore, e dashamirë të librit në komunitet.

Prania dhe mbështetja institucionale nga ana e dy ambasadave tona në Austri, e dy ambasadorëve krijues Dr. Vili Minaroli dhe Dr, Sabri Kiqmari, po u jep një vlerë të madhe këtyre organizimeve. Nga Gjermania enkas për ketë promovim kishte udhëtuar kryetari i shoqatës së shkrimtarëve nga ky vend z. Hasan Qyqalla me bashkëpunëtorët e tij z. Fran Tanushi dhe z. Muhamet Luma.

Moderatore e këtij promovimi ishte poetja z. Edona Quku, kurse fjalën e hapjes e mbajti kryetari i shoqatës “Aleksandër Moisiu” Besim Xhelili, i cili falënderoj ambasadën për mbështetjen e vazhdueshme që po u bënë krijuesve, ai i uroj krijuesit për promovime të shumta dhe të suksesshme . Në emër të shoqatës të pranishmit i përshëndeti sekretari z. Anton Marku duke bërë prezantimin e librit të parë. Ai falënderoi të gjithë autorët e këtij libri.

Ambasadori i R. Së Kosovës Dr. Sabri Kiqmari në fjalën e tij përshëndeti të pranishmit, duke u përqendruar të organizimet e shumta nga mërgata shqiptare në Austri, e sidomos vlerësoi lart punën e mirë që po bënë shoqata Aleksandër Moisiu nga Vjena me promovimin e vlerave tona kombëtare. Ai tha se: “Para disa javëve ne ishim në ambientet e ambasadës së R. Shqipërisë,këtu në Vjenë, ku u bënë promovime librash, ne po e vazhdojmë atë rrugë për të mbështetur vlerat tona kombëtare. Ndjeni veten si në shtëpinë tuaj, kjo është shtëpi e të gjithë qytetarëve kosovarë, e të gjithë shqiptarëve. Vepra e juaj Illyricum me autorë shqiptarë që jetojnë në Austri është një mënyrë shumë e mirë e promovimit të vlerave tona nga autorë që vijnë nga të gjitha viset shqiptare. Fjala e këtij libri simbolizon rrënjët e kombit shqiptar, Ilirinë” tha ai në fjalimin e tij.

Ambasadori i R. së Shqipërisë Dr. Vili Minarolli pas përshëndetjeve të rëndomta për të pranishmit, foli për promovomin e këtij libri duke thënë se “Ju falënderoj për ftesën, ju përshëndes për nismat e mira që bëni, tani më nismat tuaja janë institucionalizuar, përderisa ne (shtete tona) të krijojmë një qendër kulturore të përbashkët në Austri, ne do hapim dyert e ambasadave çdoherë për krijuesit tonë. Ju preferojë sidomos shoqatës, që të themeloni një çmim shpërblyes për krijuesit më të mirë, për të motivuar edhe më shumë këta krijues. Ndërsa për librin e botuar nga shoqata Illyricim tha se:”Familja e krijuesve shqiptarë në Austri, shkrimtarë, piktorë, publicist, skulptor dhe artist tjerë, tani ka botimin e saj, ka fytyrën e saj, për ta prezantuar tek të tjerët. Ne shqiptarët jemi krenarë me historinë tonë, të krijosh art kombëtar larg atdheut është dashuri për vendlindjen për popullin tënd. Tani kur ne kemi krijues është me rendësi që të kemi edhe kritik letrar, për të dalluar vlerën ”.

Poeti Fran Tanushi nga shoqata e shkrimtarëve në Gjermani bëri prezantimin e librit antologjik “Një shekull dritë” nga 100 poet me 100 poezi të përgaditura nga poeti z.Hasan Qyqalla. Ai tha se: “Kemi nderin që para këtij auditori të promovojmë këtë libër antologjik, falënderoj të gjithë kontribuuesit në botimin e këtij libri, duke filluar nga anëtarësia që na ndihmoi shumë, si dhe z. Hasan Qyqalla për punën e tij. Sidomos një falenderim i posaçëm kemi për Ministrinë e Diasporës personalisht z. Ibrahim Makolli që e mundësuan botimin e këtij libri në Tiranë” Zoti Fran Tanushi dhuroi ambasadorit Dr. Sabri Kiqmari një revist me përmbledhje të të gjithë numrave. Edhe poeti Hasan Qyqalla në fjalën e tij falënderoi shoqatën Aleksandër Moisiu për punën e saj, ai edhe njëherë falënderoi të gjithë kontribuuesit në botimin e antologjisë.

Besim Xhelili për librin e Anton Markut “Në duet me vetveten” tha se:”Është një vëllim poetik që trason vlera në njërën anë dhe hulumton modernen në anën tjetër. Ky bashkëdyzim idesh, temash dhe frymëzimesh ngjizet me sublimen, afinitetin dhe krenarinë kombëtare”.Libri është përkthyer edhe në gjuhen gjermane, ku është pritur mjaft mirë nga kritiket e letërsisë austriake.

Libri “... dhe vjen një ditë...” nga Dan Kosumi, ishte libri i radhës që u promovua, i cili doli nga shtypi në fund të vitit 2012. Është një libër poetik, i cili në vete shtron çështje të ndryshme dhe të shumta, i vlerësuar shumë nga poet tjerë, libër që krijon diskurs në letërsinë e sotme sipas redaktores Majlinda Rama.

Në mungesë të autorit të librit“Andrra e lumturueme”nga poeti shkodran Ragip Dragusha prezantimin e tij e bëri z. Besim Xhelili, ku foli për brendinë dhe tematikën fjala kryesore e tij kishte një kuptim të plot “E thashë e lirova shpirtin pasi lexova librin e Ragipit”. Një libër me buqetë poetike, ku autori shpreh mall, brengë, gëzim dhe shqetësim për atdheun.

Vargjet e poetit Besim Xhelili “Baladë e ngrirë” i prezantoi redaktori i këtij libri Amir Jonuzaj, duke thënë se për lexuesin është mirë që këto shkrime ti lexojë nga fillimi sepse përmbledhja ka lidhshmëri të pandarë në kuptim dhe vetëm atëherë mund të kuptojë autorin dhe mesazhin e tij që dëshiron të përcjellë të lexuesi.

Romani nga Driton Smakaj “Udhëkryqe Misionesh” ka për tematik kohën e luftës, ku një agjent që i shërbente U?K-s, pranon një telefonat nga një burrë me ndikim në trevat shqiptare. Misioni i tij qysh në fillim has në vështirësi me zbulimin e shokut të vrarë dhe deshifrimi i kodeve të shërbimeve informatike. Misioni ka një rrugë të mundimshme dhe të gjatë.

Në fund u promovua edhe libri “Shtegtari i largët”me poezi nga Amir Jonuzaj, ky libër nuk ishte e paraparë të promovohet, por pasi që priste 18 vite për tu promovua, ku recensent ishte Ali Podrimja dhe Ramiz Kelmendi, autori foli për librin dhe i lexoi dy poezi.

Gjithsejtë u promovuan 8 libra të krijuesve nga mërgata shqiptare. Ky organizim si promovim kryesor kishte librin “Illyricum” të shkruar nga 18 autorë. Pastaj librat “Në duet me vetveten” nga Anton Marku, “Baladë e ngrirë” nga Besim Xhelili, “Andrra e lumturueme” nga Ragip Dragusha, “Një shekull dritë” nga 100 poet, e përgatitur nga Hasan Qyqalla, “...dhe vjen një ditë” nga Dan Kosumi, Libri me poezi “Shtegtari i largët”nga Amir Jonuzaj, si dhe Romani “Udhëkryqe Misionesh”nga Driton Smakaj.

Në fund të gjithë pjesëmarrësve ju dhurua nga një libër, kurse shoqata Aleksandër Moisiu për mysafirët e largët shtroi një drekë.