E merkure, 21.02.2024, 11:49 AM (GMT)

Kulturë

Arif Kutleshi: Protestojnë

E hene, 30.01.2012, 06:38 PM


Arif  KUTLESHI

akutleshi@hotmail.com

 

PROTESTOJNË

 

protestojnë

bashkë me tymin gazmor

që proteston kundër dobësimit të diellit të kallnorit

 

spërkatin nga ana tjetër herë pas herë

me ujë të ftohtë në minus gradë

me qëllim që ta kthejnë në akull

buzëqeshjen e një brezi

që flet gjuhën e vet dhe dëgjon zemrën e vet

 

dëgjohën zëra thirrje ulurima

nga kokat e avulluara që presin

të kositen nga kërbaçi

 

shpinë pas shpine që të mbrohet kurrizi

anipse duart s´ka kush t´i mbrojë

nga hekurat, se s´kanë imunitet

 

ata protestojnë rrugës dhe arave dhe dyqaneve

s´ka kush t´i strehojë t´u jap ujë t´i pastrojnë sytë

të mos verbohen

të mos helmohen siç i helmuan vëllëzërit e tyre

në 88/ten

 

dalin nga portat e afërta dhe bien në pritë e kositen

ulen në asfalt me shpresë por rrënjë nuk mund të lëshojnë

dhe kositen

 

njëri provon me karrocë në emër të invaliditetit

që nuk ia njohën, sepse çuditërisht kishte ngelur gjallë

dhe s´mund ta shpallnin hero të mermerit

dhe kositet

 

një nënkryetar i parlamentit i ha çizmet veshkëve

të mos adrenalinohet kundër sindromit të stokholmit

 

lëvizin nëpër borë arave të dheut të bardhë

a dheut të zi të Llapit

 

se u ka ardhë tambëli i nanës në fyt

duke i paguar Serbisë haraç për djegiet e shtëpive

përdhunimet plaçkitjet masakrimet dëbimet

 

dymbëdhjetë mijë punëtorë serbë marrin rrogë nga motra

dhe gruaja dhe nëna ime

të përdhunuara dhe të djegura midis oborrit

 

dymbëdhjetë mijë punëtorë serbë punojnë në fabrikën e babës

që e gjeta mbas dy vjete në pusin tridhjetë e dy metra të thellë

 

tre fëmijët e mi hanin ende keksa plazma

në qiellin e shtatë të parajsës

si të ishin në Karagaç

 

a do të më mbesin edhe mua në fyt

si llokumet me arra të Krushevcit

gjëma e motrës e nënës e gruas dhe ulurima e fëmijëve

 

a do të më mbes në fyt mallkimi i tyre

për tregtinë gjithnjë të lirë apo jo

me kasapët

 

e lirë tregëtia dhe ajri dhe lëvizja

pa viza po po

si tulipanet holandeze

 

mall i lirë që duhet të jemi të lirë si vaji i kondensuar

që lubrifikon zorrët poltroniste

 

t´u shkojmë kasapëve në duar

të gatshëm për flijime të reja

duke paguar në dorë me euro

gjëmën tonë të re

të së nesërmes

 

mos i zini rrugët të na i sjellin makinat përplot eshtra

a hirin e urnës të të djegurve në tymtarët e Majdanpekut

 

hapni rrugën magjistrale nacionale le të na e sjellin hirin

e Ukshin Hotit

ta derdhim, më në fund, në dri të bardhë

a në kristalorin e Prizrenit

 

le të na i sjellin ato njëqindmijë copë eshtrash të copëtuara

le t´i sjellin se po i presim qe dymbëdhjetë vjet

bashkë me dyert e shkreta të Mejës

 

ta nisim një biznes të ri para se të skadojë gazi lotësjellës

pa ADN veç me sharje nënash tashti në shqipen tonë

të pavarur

 

reciprokisht si gjithmonë ata lëkurën tonë për tarabuka

ne demëshpërblimin të ndarë në dy pjesë, siç ndahet buka...

 

kallnor, 2012



(Vota: 0)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora