Cikël me Poezi nga Faik Krasniqi

Faik Krasniqi ka lindur më 21.10.1978 në Prishtinë. Me profesion është publicist, poet dhe politikolog. Ka mbaruar shkollimin fillor, të mesëm dhe të lartë në Gjermani. Gjatë qëndrimit në mërgim, në Suedi dhe në Gjermani, ka qenë publicist për disa gazeta suedeze dhe gjermane, si; ”Zweibrucker Zeitung”, ”Pfalzischer Merkur” dhe” Rheinische Post” etj, etj. Për gazetat shqipe prej vitit 1997-2000 ka qenë publicist pranë gazetës së përditshme ”Bota Sot”, si dhe për gazetat” 24 Orë”, ” Dita” etj. Një kohë ka qenë botues dhe kryeredaktor i gazetës elektronike”TAKENEWS.INFO”. Momentalisht është publicist dhe redaktor pranë gazetës elektronike”Nacional Albania”, si dhe publicist pranë gazetave ditore në shqip ”Infopress” (Kosovë), ” Tribuna Shqiptare” (Kosovë), dhe kohë pas kohe edhe në gazetat tjera në shqip, gazeta”Sot” (Shqipëri), gazeta”55”, gazeta''Shekulli'', ”Koha e Re” (Maqedoni), ”Lajmpress”(Maqedoni), ”Kosova Sot” (Kosovë), ”Bota Sot” (Kosovë), ''PrishtinaPost'' si dhe kontribues në shumë gazeta elektronike. Është publicist, poet dhe shkrimtar i njohur në të gjitha viset shqiptare por edhe jashtë saj. Është edhe anëtar i Këshillit Drejtues të Lëvizjes''ALEANCA KUQ E ZI''. Në gusht të 2010 në shtëpinë botuese ”ADA” në Tiranë ka botuar librin romantik me poezi ”Ëndrrat për ty”,  si dhe të njëjtin libër e ka botuar në dhjetor të 2010 në anglisht në SHBA me titullin ”THE DREAMS FOR YOU”. Së shpejti do të boton edhe dy libra të tjerë, një libër me poezi romantike dhe një me fjalë të arta. Për Zemra Shqiptare shkruan për fushën e politikës dhe kulturës.

Faik Krasniqi

NJË LOT

I mbyll sytë,

i them vetes është vetëm një ëndërr,

se ti nuk je vërtetë kaq larg,

një buzëqeshje e lehtë më kap,

hap sytë,

një lot buzën befas më lag

JE

Je gjëja më e bukur që mund të ekzistonte

ndonjëherë mbi tokë...

Je motivi i kësaj jetë...

më motivon të luftoj për jetën dhe për ty...

Je ndjesia më e paimagjinueshme...

Je personi më i rëndësishëm i jetës sime...

Je gjithçka për mua...

lutem çdo ditë për ty

dhe ndihem njeriu më me fat që të kam.

Të dua shumë dhe të adhuroj

DUA TË JETOJ ME TY

Mos më kujto të shkuarën time

se në të shkuarën time mungoje ti

kujto veç të tashmen dhe të ardhmen

janë veç këto dy momente që dua të jetoj me ty!

E PRITA

E prita fjalën tënde

përgjigjen shekullore,

vështrimin e fshehur

buzëqeshjen vajzërore

E prita dashurinë tënde

që zemrën e lodhi

E prita bukurinë tënde

nga errësira që doli

Eja të thirra

dorën më shtrëngo,

më përqafo mua

shpirtin më dhuro

KUR DY ZEMRA

Kur dy zemra bien në Dashuri

fillon toka të notojë

Kur dy zemra preken

puthet Toka me Saturnin

Kur dy zemra lidhen

përgjithmonë bashkë të jetojnë

NË TËRË TRUPIN TËND

Në tërë trupin tënd

Shikimin ta lëshoj

Më pëlqen nganjëherë

Kur më ngacmon

Me bisht të syrit të vështroj

Buzën ngadal e kafshoj

NË SYTË E TU

Në sytë e tu shoh

Qiellin dhe detin blu

Në sytë e tu shoh

Një det të tërë me dashuri

MË LERË TË VDES

Nëse ti nuk vjen

Mos më lerë të pres

Merre zemrën time

Dhe më lerë të vdes

DASHURIA

Dashuria është buzëqeshje

por është dhe qarje e lot.

Dashuria është diell

por është dhe shi,

ndonjëherë është erë e lehtë,

furtunë e stuhi

Dashuria është ditë e gjatë

por dhe natë pa mbarim

ME MALL TË KËRKOJA

Në pafundësinë e qiellit

sytë e tu kërkoja,

po si gjeja dot

e me mall të kujtoja

Mbylla sytë e për një çast

të ndjeva pranë,

e theva atë largësi,

atë largësi që na ndan.