Poezi nga Dibran Demaku

Dibran Demaku

POEZI

SHPRESA

Ënderr zhgjënderr rrugëton shpresa

nuk i vë dot kush pengesa

se lag shiu as se lag vesa

Se zë dot as valë e detit

nuk e kap ushtri e mbretit

as udhëkryqet e kurbetit

Është e vjetër sa vet bota

nuk i vë kush nën këmbë rrota

as thërmohet sikur gota

Nuk vdes as kur vdiset

nuk kthehet kur niset

se në zemër stiset

Në mëdyshje e dilema

çel burbuqe sikur pema

rritet, rritet në sytha e gema...

BESA

Xhevahir i burrit

në kulla prej gurit

pleksur në palë te Flamurit

E rinojnë ditët

nuk e plakin vitet

në sy e bebza rritet

E mbëltuan në gjak

ëndërr e bardhë në prak

dritë për çdo konak...

ZVARRANIKËT

Zvarranikët pushojnë nën Mriz

të pa emër e të pa kurriz

Mëshehur nën hijen e mosit

i fryejnë kungullit,i fryejnë kosit

Shpesh tregohen si trima

veç futen si minjt në vrima

Jetë e tyre kalon zvarrë

që nga lindja gjer në varr...

VETMI

Çerdhe pa dallëndyshe

nipër e mbesa pa gjyshe

Në rrugë të madhe

pa miq

Lis pa gjethe

lakuriq

Vetmi...

KRIMBAT

Kohë e krimbave erdhi

mërzinë e ditës e derdhi

mbi supe

mbi gjymtyrë

mbi tru

Vërsulen krimbërisht

mbi dëshira

mbi ëndrra

mbi shpresë

Krimbat e pabesë...