Ejup Ceraja: Kur rigonin lot dhembjeje e krenarie

Ejup CERAJA

POEZI - AKROSTIK

(Për nder të 28 Nëntorit – Ditës së Flamurit tonë Kombëtar)

KUR RIGONIN LOT DHEMBJEJE E KRENARIE

Gjëmë të mëdha binin atëherë mbi popullin arbëror

Ende pa përfunduar një betejë, vinte tjetra e tmerrshme

Rigonin lot dhembje e krenarie si në dimër dëborë

Gjakonte lirinë Arbëria në beteja të përhershme.

Kalonin ditë, muaj e vite si kalon lumi nën urë

Ashtu vinin rrebeshet armike kudo me furi

Sa krenar qëndronte Arbëria e nuk tundej kurrë

Ti kishe trup atleti që i rrije kombit roje përbri.

Rinia qëndronte krenare në ballë e pa përkulur

I kundërvihej armikut si llavë e vullkanit

Oshtinin fushat dhe malet si toka e lëkundur.

Trimat po ia sillnin lirinë atdheut me teh të jataganit

Ishin mburojë kudo e qëndronin të pa tundur

Turreshin mbi pushtuesin si luaj në log të mejdanit.

(1994)

ISHTE SIMBIL I burrërisë

Ishte simbol i burrërisë si në epokën e vjetër

Siç dinë të jenë trimat në aso rrethanash - prore

Me vullnet ecte rrugës së mëvetësisë si asnjëherë tjetër

Ashtu siç ec lumi nën tokën e etshme - gëlqerore.

Ishte pishtar i bashkimit për përparim e pavarësi

Levave të jetës shkonte nëpër qendra të diasporës

Që nga Stambolli u nis i bindur për drejtësi

Edhe përmes rreziqeve ecte në drejtim të Vlorës.

Me dashurinë sublime - ideal të besnikërisë

Angazhimin e kreu si e kërkonte nderi i burrit

Lule me kurorë në Shpalljen e Pavarësisë

Ishte shkëmb graniti në ngritjen e Flamurit...

(1994)

Si këngë Orfeu përhapej jehona

Ishte si gjeneral, po mbi të gjitha ishte burrë

Sa ia kishin lakmi edhe gjeneralët me fam’

Ashtu siç ishte Gjergj Kastrioti i ynë dikur

Burrështetas i urtë, i famshëm e me nam...

Oshtinte jehona anë e kënd për liri

Luftohej kudo me armiqtë dhëmbë për dhëmbë

Endej kushtrimi nga vërria në vërri

Testament për brezat nga shkëmbi në shkëmb.

I madh qe vullneti për të cilin një jetë të tërë luftoi

Në shpirtin e tij si këngë Orfeu përhapej jehona

I lartë qe ideali për të cilin me djem jetën e flijoi

Ti i nderuar për jetë do të mbetesh në zemrat tona.

(6 nëntor 2010)

FLIJIMI Në altarin e lirisë

Adem Jashari – komandanti i UÇK-së u lind

Ditën e ndritshme të Flamurit tonë Kombëtar

E plotësoi amanetin e të parëve si një prind

Me trimërinë më epike në luftë me grabitqarë.

Jetën e vet e flijoi në altarin e lirisë  

Ashtu si e flijuan nëpër kohë shumë atdhetarë

Shembull për trimëri ishte nga koha e fëmijërisë

Atdhedashurinë e kishte idealin e parë.

Rëndonte mbi shpirtin e tij atdheu i robëruar

Ishte rënia heroike e tij që e tundi botën mbarë

Ti na e thadrove në shpirt dashurinë për t’u çliruar.

 (7 nëntor 2010)