Kulturë
Poezi nga Vullnet Mato
E diele, 30.05.2010, 03:46 PM
Vullnet Mato
VALLËZIM ME PULËBARDHAT
(Në kujtim të atyre që humbën jetën për emigrim)
Te brigjet përballë
arritën anijet
me refugjatë të alivanosur
nga asfiksia e ngjeshjes.
Ditë me radhë
Adriatiku pas tyre,
përkundte kufoma
në vallëzimin e vdekjes.
Nënat ëndërronin
dasmat, pasuritë...
Teksa dhëndurët e rinj
mes dallgëve strukur,
vallëzonin me pulëbardhat
që u çukitnin sytë
dhe grindeshin
kush të rrëmbente
sytë më të bukur...
O nëna, të mjera,
që do të vajtoni
edhe shumë vite !
Nuk ka det
që ua mbush atë zbrazëtirë .
Por edhe t’i ngjallnit
me lotët e dhimbjes,
ata prapë do të orvateshin
për jetë më të mirë...
KUR ZEMRA KRIJON ZEMRËN
Zemra e dashuruar nga bota e femrës
krijoi një zemër tjetër brenda në trup
dhe ndjeu befas trokitjen e re të zemrës,
Trok! - truk! ... Trok! - truk !...
Jeta e saj krijoi thelbin e një tjetër jete,
që filloi të trupëzohet si kokërr frut,
dhe ndjeu të rrahin dy dallgë në det,
Trok! - truk! ... Trok! - truk !...
Gëzimi i saj arriti majat e kulmit,
Shpirti i këndon me volumin në fund.
Kambana e artë bie në kambanoren e trupit,
Trok! - truk! ... Trok! - truk !...
Nëna ndriçon natën me sytë e qeshur.
Mjedisin e sheh të lulëzuar gjithkund.
Hapat i hedh me ritmin e ri të zemrës,
Trok! - truk! ... Trok! - truk !...
Gjaku i bëhet nektar nëpër vëna,
të ushqej ëmbëlsisht zemrën e butë,
që rritet çdo çast nga rrahjet e veta,
Trok! - truk! ... Trok! - truk !...
O njerëz, hapni udhën me përnderim!
Kalon shtatzëna me dy jetë në trup!
Sjell për ne zëra gazmor e gjallërim,
sjell të nesërmen tonë më të bukur!...
Nëntë muaj nëna me durimin kulmor,
përkund krijesën që noton te placenta.
Ai rritet në shtratin e qiellit ujor,
dhe kërkon dalje duke gjuajtur me shkelma.
Vjen dhe çasti kur me britmat e lindjes
të katër muret përqark i tund me hare.
Pastaj bebja ndez dy yjet e tij në qiell
dhe thërret “Uaaa! Uaaa!” gjer në re.
Thotë: “Uaaa” solla pranverën te shpirti,
ndaj kohën tuaj ma falni ta kem për vete.
Diellin e dua të perëndoj e të lindi
aq herë sa fle e zgjohem me etje.
Nëna i përgjërohet përditë e përnatë,
zemrën e saj e bën shtrat të zemrës së tij,
që bebja të arrijë degët e lisit të lartë,
për ta zgjatur degën fisnore në përjetësi...