Albina Balidemaj: Prof. Dr. Sabile Keçmezi-Basha ‘’Të burgosurit politik shqiptar në Kosovë 1945-1990’’

Libra të rinj shkencorë

PROF. DR. SABILE KEÇMEZI-BASHA “TË BURGOSURIT POLITIK SHQIPTAR NË KOSOVË 1945-1990”

Nga Mr. Albina Balidemaj

abalidemaj@hotmail.com

Ditë më parë doli nga shtypi edhe një libër shkencor i Prof. Dr. Sabile Keçmezi-Bashës, e cila për temë trajtimi ka të burgosurit politik shqiptar që nga viti 1945-1990. Periudhë e gjatë historike, histori e tmerrshme për shqiptarët që kaluan nëpër burgjet e kazamatet e  ish-Jugosllavisë mbi 666 shekuj, 72 vjet e 7 muaj burgim. Autorja gjerë më tani ka botuar shumë  monografi po të njëjtit fah si: “Lëvizja ilegale patriotike shqiptare në Kosovë 1945-1947”; “Organizatat  dhe grupet ilegale në Kosovë 1981-1989 (Sipas aktgjykimeve të gjykatave jugosllave)”; “Shtypi ilegal shqiptar në Kosovë 1945-1999”, tani nga Shtëpia Botuese “Logos-A”, iu botua edhe libri voluminoz (600 faqe) i radhës, që në vete ngërthen e mbarështon materiale mjaft interesante si për kohën po ashtu edhe për vet historinë më të re shqiptare. Autorja, me një mjeshtri të rrallë prej studiueses shkencor, dhe duke u nisur nga një parim elementar hulumtues në baza kronologjike, duke u bazuar në të dhëna të argumentuara dhe të faktuara nga vet gjykatat e Qarqeve që kanë vepruar në Kosovë e më gjerë, vije deri te të dhënat rrëqethëse .

Prof. Dr. Sabile Keçmezi-Basha, librin e ka konceptuar dhe ndarë në shtatë pjesë kryesore, duke filluar nga Parathënia, Hyrja e cila ka të dhëna të shumta shkencore dhe të argumentuara në forma tabelore, grafikone të shumta të cilat dëshmojnë, se në Kosovë dhe në vitet e lartpërmendura shteti jugosllav ndaj popullit shqiptar ka kryer në mënyrë të organizuar dhe sistematike gjenocid dhe diskriminim të paparë.

Autorja e librit, ndarjen e problematikës që shtjellon në libër e bënë në bazë të mbajtjes të proceseve gjyqësore në Gjykatat e Qarqeve në Kosovë si dhe aty-këtu në tërë Jugosllavinë.

Në pjesën e parë, përfshihen të burgosurit politik shqiptar që u dënuan nga Gjykata e Qarkut në Prishtinë, 1945-1990; Në pjesën e dytë “Të burgosurit politik shqiptarë në Gjykatën e Qarkut- Prizren 1945-1990”; Në pjesën e tretë: “Të burgosurit politikë shqiptar në Gjykatën e Qarkut në Pejë 1945-1990; Në pjesën e katërt: “Të burgosurit politik shqiptar në Gjykatën e Qarkut në Gjilan 1945-1990; Në pjesën e pestë: “Të burgosurit politik në Gjykatën e Qarkut në Mitrovicë 1974-1990; Në pjesën e gjashtë: “Të burgosurit politikë shqiptar të dënuar në gjykata civile dhe ushtarake në ish-Jugosllavi gjatë viteve 1945-1990 dhe në pjesën e shtatë përfshihen shqiptarët e vrarë dhe të likuiduar gjatë viteve 1945-1990.

Veç pjesëve kryesore, libri ka edhe aparaturën shkencore që e pasuron atë, si rezymenë në gjuhën angleze, treguesin e emrave, faksimile të dokumenteve të shumta dhe burimet e literaturën.

 E botoi: Shtëpia Botuese Logos-A, Shkup, Prishtinë, Tiranë, 2010