Mendime
BDSH: Kërkesë SHBA-ve dhe BE-së
E marte, 04.05.2010, 09:46 PM
KËRKESË SHBA-ve DHE BE-së
(Përmes misioneve të tyre diplomatike në Shkup)
- Kërkesë që Kryeministri aktual i Maqedonisë, N. Gruevskin, të futet në “listën e zezë amerikane” dhe në “listën e zezë të BE-së” si person që planifikon, që ushtron dhe që mbështetë dhunën institucionale kundër shqiptarëve në Maqedoni, që nxit konfliktet ndëretnike dhe ndërfetare dhe që pengon implementimin e Marrëveshjes së Ohrit.
- Kërkesë që SHBA-të dhe BE-ja, si ndërmjetësuese në Marrëveshjes së Ohrit, të organizojnë një Konferencë Ndërkombëtare me qëllim që Maqedonia të ndalojë aplikimin e diskriminimit racial ndaj shqiptarëve dhe të ushtrojnë presionet e domosdoshme për të imponuar zbatimin e plotë të kësaj marrëveshje.
Të nderuara Zonja
Të nderuar Zotërinj,
Në disa raporte qeveritare dhe të organizatave për mbrojtjen e të drejtave dhe lirive të njeriut Qeveria e Maqedonisë denoncohet si shkaktar kryesor i nxitjes së konflikteve ndëretnike dhe ndërfetare.
Që nga ardhja në pushtet (2006), VMRO e Nikolla Gruevskit ka mobilizuar tërë arsenalin e vjetër antishqiptar për të degraduar pozitën politike, ekonomike sociale dhe kulturore të shqiptarëve në Maqedoni:
- U ndalua përdorimi i flamurit kombëtar shqiptar;
- Deklaroi publikisht në parlament se gjuha shqipe asnjë herë nuk do të bëhet gjuhë zyrtare në Maqedoni;
- Organizoi ekspedita policore dhe ushtarake kundër vendbanimeve shqiptare, që kulmuan me masakrën e Brodecit;
- Intensifikoi proceset e montuara gjyqësore kundër shqiptarëve në përgjithësi dhe ish ushtarëve të UÇK-së në veçanti;
- Vazhdoi diskriminimin e shqiptarëve në punësim;
- Pengoi investimet në vendbanimet shqiptare;
- Intensifikoi plaçkitjen e ndërmarrjeve të vogla dhe të mesme të biznesmenëve shqiptar;
- Filloi fushatën e mbjelljes së kryqeve ortodokse në territoret e banuara me shumicë shqiptare;
- Imponoi mësimin e gjuhës maqedonase për nxënësit shqiptar nga klasa e parë e arsimit fillor;
- Imponoi heqjen e mbishkrimeve në gjuhën shqipe;
- Imponoi përdorimin e gjuhës maqedonase në administratë dhe ndaloi gjuhën shqipe;
- Ndërmori shumë vendime tjera që janë në kundërshtim të plotë me frymën e Marrëveshjes Kornizë të Ohrit.
Kjo politikë nxitëse e konflikteve ka krijuar një situatë eksplozive ku shkëndija më e vogël mund të ndez një konflikt me pasoja të pallogaritshme.
Të brengosur nga kjo situatë, misionet e SHBA-së, BE-së, NATO-s, dhe OSBE-së në Shkup
nga “të gjitha palët të dyfishojnë përkushtimin e tyre ndaj harmonisë ndër-etnike dhe të përmbahen nga çdo veprim që mund të shkaktojë tensione”.
Kjo kërkesë u përshëndet nga shumica e forcave politike në Maqedoni. Pos Nikolla Gruevskit, i cili e injoroi publikisht duke deklaruar se “Reagimi i komunitetit ndërkombëtar nuk ka të bëjë me te”.
Ai nuk u ndal me kaq. Me veprime konkrete ai dërgoi mesazhe të qarta se nuk është i interesuar të ndërpres nxitjen e konflikteve.
Në vend të amnistisë dhe ndërprerjes së proceseve të montuara gjyqësore, që do të kishin ulur tensionet dhe revoltën e shkaktuar nga logjika e diktatit politik mbi gjyqësinë, ai urdhëroi Gjykatën e Shkupit që të dënojë edhe tre shqiptarë me burg të përjetshëm.
Të nderuara Zonja
Të nderuar Zotërinj,
Kjo politikë antishqiptare dhe antidemokratike e VMRO-së dhe e liderit të saj z. N. Gruevskit
paraqet aventurë të rrezikshme politike që destabilizojnë vendin dhe rajonin,
Bashkimi Demokratik Shqiptar kërkon nga SHBA-të dhe BE, si ndërmjetësuese në Marrëveshjen e Ohrit, që Kryeministrin aktual të Maqedonisë z. N. Gruevskin ta fusin në “listën e zezë amerikane” dhe “listën e zezë të BE-së “si person që planifikon, që ushtron dhe që mbështetë dhunën institucionale kundër shqiptarëve në Maqedoni dhe që pengojnë implementimin e Marrëveshjes së Ohrit.
Të nderuara Zonja
Të nderuar Zotërinj,
Bashkimi Demokratik Shqiptar konsideron se SHBA-të dhe BE-ja, si ndërmjetësuese në Marrëveshjen e Ohrit, duhet të organizojnë një Konferencë Ndërkombëtare me qëllim që Maqedonia të ndalojë aplikimin e diskriminimit racial ndaj shqiptarëve dhe të ushtrojnë presionet e domosdoshme për të imponuar zbatimin e plotë të kësaj marrëveshje.
Bashkimit Demokratik Shqiptar
Bardhyl Mahmuti
3 maj 2010