E merkure, 01.02.2023, 09:24 AM (GMT)

Kulturë

Qazim Shehu: Vezulli

E enjte, 20.11.2014, 06:13 PM


VEZULLI

 

QAZIM D. SHEHU

 

E ngutëm fjalën e na u desh,

Ta përsërisnim kuptimin e saj të humbur,

Në një vezullim afruar drejt nesh,

Në buzë që kërkonin një të puthur.

Sakaq vezulli qe shkrirë,

Buzët puthitur ,bërë një,

Puthja duke vetëtirë,

U hepua  pa zë.

U shtangëm të ngrirë e t`ia nisnim,

Nga fillimi e kotë ish,

E cytëm fjalën si një gjemb,

Që e harrojmë në mish…

 

 

YLL I VETMUAR

 

Malli pat pikuar, yll i harruar,

Që nuk e pa kush,

Më gjatë se të tjerët rrinte  kreshpëruar,

Kur qielli ndizej prush.

Duke pritur gjithë një vështrim,

Të tjerët u ngopën me të,

Dhe shkrihet  në falenderim,

Kur sytë malli drejt tij i ço…

 

 

IKJET

 

Hidhërimet e ikjeve janë si vera,

Përfundojnë në një sokëllimë,

Gjithnjë u flas çasteve për çaste të tjera,

Që priten të vijnë.

Pa folur për ikjen e tyre,

Për ç`gjurmë lanë e habi,

Ndërsa ndjej si u shpëton prej syve,

Lot i hutuar në tradhti…

 

 

RRËMOJ LOTIN

 

Rrëmoj lotin e gjej në thellësi të tij,

Degët e bleruara të një kajsie,

Gjej aromën e një pllaje  në gushë malesh,

Dhe muzgjet e ngjyrta  me dashuri livadhesh.

S`di pse përherë loti më afron një peizazh,

Ca pemë përmbys në kujtesë,

Rrënjën e thellë të shkrirë në afsh,

Për gjethet që mbi kokë pemësh farfurijnë…

 

 

FUTA E NATËS

 

Futa e natës dridhet në përparësen e gjyshes,

Në udhën e gjatë për tek nëna,

Më e artë se fole e dallëndyshes,

Me shuajt e fjalëve të ngrëna.

I ndez lëkurët e daulleve që do bien,

Në emër të mallit tim,

Kjo futë ku zjarre malli gjithnjë ziejn,

Të zezën pa ndalur e ndrin…

 

 

NË RRUDHA

 

Në rrudha shoh një ikje moshe,

Kurrë një mendim,

Si brazdat e kthyera të një toke,

Me shekuj djerrinë…

 

 

DRU I PRERË…

 

Ashklat e drurit janë shpirti i tij,

Ndërsa qeshin dhëmbët e sëpatës,

Gurët e drurit  këto ashkla,

Hedhur drejt nesh.

Një curril në shkëmbin e murmë,

Pasi e njomi rrënjën e tij,

Shpërtheu si lot i drurit,

Stalagmite u ngri…

 

 

HAPËSIRË E MBRËMJES

 

Hapësira e mbrëmjes na mpak dhe na çon,

Pranë vatrës të ndjehemi të plotë,

Ndonjë të vonuar e qorton,

Ia sit mendimet në kokë.

Skelete drurësh në muzg,

Dhe dritat e ndezura pa dashje,

I hedh ajo me ngut,

Edhe më të vonuarin,

Ta çojë pranë vatre…

 

 

ULËRIMA UJQËRISH

 

Ulërima ujqërish shpesh dëgjoj

Në valë telefonash,

Një valë jehone të afërt,

Që kur u qerosën pyjet tona,

Si faqet e një plake.

 

Thirrma histerike, bërtitje, ofshe,

Ngërdheshje, kërcënime, sharje,

Pranë njerëzve si pyje të fjetura,

Moderne pamje...



(Vota: 2 . Mesatare: 5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora