Kulturë
Demir Krasniqi: Spiunët e këngës sime
E merkure, 21.05.2014, 07:30 PM
Demir KRASNIQI :
SPIUNËT E KËNGËS SIME
- Rapsodi historike -
Nuk po mundëm me u rehatua –
Një këngë t’ hidhur pa e këndua !
Brezave t’ ri për t’iu tregua –
Çka m’ kanë bë spiunët mua !
Që kur këngën e kam nisë –
Shumë spiunë mu kanë vardisë !
Tu m’ përcjellë pas ditë e nat’ –
S’ më kanë lanë kurrë n’ jetë rehat !
Tu m’ përcjellë pas hap me hap –
Prej vendlindje në Gollak !
Prej qytetit në qytet –
S’ më kanë lanë kurrë n’ jetë të qetë !
S’ pari herë punën kam nisë ,
Në detyrën e mësuesisë ,
Në Tugjec , si arsimtarë ,
Po sa punën pata fillua ,
Për vend tim me kontribuua ;
Shumë spiunë janë aktivizua –
Çfarë këngësh nxënësve jam tu iu mësua ?!
N’ dasma e ndeje nëpër Gollak ,
Më përcillnin hap me hap –
Çka po flas , çka po këndoj ,
Që në UDB-e t’ më lajmërojnë !
Pse ua mësova nxënësve Skënderbeun –
Mua nën këmbë ma mihën dheun !
Pse ua mësova nxënësve Librazhdin –
Shkuan në UDB-e e ma banë grazhdin !
Këta lugat – pjellë e Shpend Keqit ,
Qenë spiunë – argat të Dreqit !
Që për hatër të Serbisë –
Bënin kurthet shqiptarisë !
Hap për hap vëzhgonin malet –
Përcillnin intelektualët !
Që në odat e Malësisë –
T’ mos përhapin ndjenja t’ atdhedashurisë !
N’ dasmën time të martesës –
M’ i errësuan rrugët e shpresës !
Shumë spiunë m’i kishin qua –
Dasmën time me e përgjua !
Një spiun me plis të bardhë ,
Magnetofonin e kishte marrë ,
Ishte ulë n’ odë , n’ staf me t’ parët –
T’ incizojë çfarë këndojnë këngëtarët !
Vëzhgonte odën cep me cep –
Me armë zjarri kush po qet ?!
Brohoriste me gjithë zemër –
Tu i përmendë emër , mbiemër !...
-Hajt Filan , të pastë Malësia ,
Të lumtë gishti e t’ lumtë alltia !
-Hajt Filan , ty të pastë fusha ,
Të lumtë gishti e të lumtë pushka !
Po sa dasma ka mbarua –
N’ Kamenicë , natën ka shkua !
Magnetofonin n’ UDB-e me e qua –
Çka kanë këndua e kush ka gjua !...
N’ çdo krahinë kah ka shqiptarë –
Kam marrë pjesë si këngëtarë !
Kam folë shlirë e kam këndua –
Kurrë askush s’ më ka spiunua !
T’ gjitha t’ zezat mu kanë kurdisë –
Në Gjilan e n’ Kamenicë !
Shpifje t’ rënda , etiketime ,
Spiunazhe e incizime !...
M’ thirrshin n’ darka nëpër katunde –
Unë s’i njihja kush janë spiunët !
Këngët e mia i incizonin –
N’ mëngjes n’ UDB-e i dorëzonin !
N’ jetë t’ përditshme e n’ aheng dasmash –
Spiunët tanë ishin dy farërash !
Një palë ishin spiunë me pare ,
Tjetra palë ishte vullnetare !
Spiunët me pare , si me bajrak –
Njiheshin n’ rrugë e në konak !
Por spiunët vullnetarë –
Ishin n’ popull të pa parë !
Vullnetarët betoheshin n’ Zot ,
Shiteshin shumë patriot !
N’ plisa t’ bardhë në odë e n’ shesh –
Me mustaqe vesh me vesh !
Si në dasma , ashtu n’ hotele –
S’ më kanë lanë kurrë pa përcjellje !
Në hotele e n’ restorant –
Seç maskoheshin si çobanët !
Këta mendonin se nuk po i shoh
Dhe mendonin se nuk po i njoh !
Natë për natë më bënin rojë –
Tu m’ përcjellë çka po këndoj ?!
M’ akuzonin kjo pjellë e piste –
-Shpejt këto këngë kem me t’i ndalë –
Kurrë prej burgut s’ ke me dalë !...
-Ti e kishe kryet si lodër –
Por shumë shpejt do ta bëjmë mrizin !...
-
Por shumë shpejt do ta bëjmë gjëmën !
Do t’ thyejmë eshtrat , ta luajmë nënën ,
Nuk do t’ bien ma n’ mend për këngën !...
Qitsha lutje për punësim –
Ata m’ lypshin bashkëpunim !
-Me t’ dhanë leje me u punësua –
Për ne duhesh me punua !
38 vjet punë nuk janë pak –
Kur më qitën në sokak !
Për këngë t’ mia morën hak ,
Kështu spiunët e Serbisë –
M’ ia kanë mbyllë derën shtëpisë !
Ma vranë këngën , m’ vranë për s’ gjalli –
M’ lanë pa bukë , të më djeg malli !
Ka pas thanë mixha Hasip –
Kurrë s’ qet pushkë daja për nip !
Por , kur daja bien në gjak –
Gjithmonë nipi do t’ merr hak !
Në Kosovë , n’ këtë vend të shkretë –
Sunduan shkijet njëqind vjet !
Shuan dritë e shuan shpresa –
Mbollën shumë nipa e mbesa !
Edhe një shekull do t’ kalojnë –
Nipa e mbesa nuk do t’ harrojnë !
Ua lanë nënat amanet –
T’ qesin pushkë për dajë të vet !
Gjilan, më 16.05. 2014.