Sevdail Hyseni: Lufta në prag - lepuri në bark!

Sevdail Hyseni

Satirike

Lufta në prag - lepuri në bark!

Serbia po zien si kazan me fasule,

nga protestat me daulle e zurle.

Shqipëria rrotullohet në karusel,

me Kosovën “zgjedhore” paralel.

Bosnja i numëron ditët e stisura,

si kalendar me faqe të grisura.

E “Srpska” luan “kush pulit i pari”,

në një shtet që zgjohet pas pazari...

Në botë Amerika, Izraeli e Irani

po i shtrijnë këmbët përtej jorgani.

Luftë “të qëndrueshme” nis Bejruti,

era fryn nga Lindja, me aromë baruti.

Ironikisht, në këtë karnaval global,

Bashkimi Evropian flet si papagall:

- Mos u shqetësoni, jemi nën kontroll!

E neve nga frika na mbyti një kollë.

Dhe çuditemi: - Si ka mundësi?

Tregu i armëve rritet me shpejtësi.

Kur paqja është thjesht deklaratë,

me luftën botërore si me kontratë?

(Karikatura marrë nga interneti)