Stefan Martiko: Universi poetik i krijueses Armela Hysi

Universi poetik i krijueses Armela Hysi

Nga Stefan Martiko

Me të marrë në dorë librin “Amazonë prej reje” të Armelës, nga poezia në poezi, verifikoja edhe një herë atë ç’ka aq shpesh ia kisha përsëritur vetes dhe të tjerëve: Isha para një zbulimi të një universi poetik. Ndaj u binda më shumë dhe tani po shkruaj këtë hyrje, si të hap një portë ku të tjerët do të hynë pa u mëdyshur. Kjo poete e vrulleve të brendshme, e shpërthimeve që turbullojnë mendimin dhe të vënë në provë intelektin, ishte partnerja ime në poezi. Ishte një zbulim i mrekullueshëm në një kohë që unë mendoja se poezinë e saj do t’a fitonte përmes prirjeve të saj që nuk do të ishin kurrë aksidentale. Ajo është e vetmuar në këqyrjen e botës përreth, e shikon atë përmes një intelekti dyshues, pohimi dhe mohimi të vazhdueshëm, e prek sëmundjen e jetës aty ku ajo lufton për t’i shpëtuar vdekjes. Kjo poete e re vigjëlon format e një poezie, ndoshta ende të pashfaqur, që Armela Hysi nuk ka ende statusin që i takon në poezinë shqiptare, por është plot të ardhme. Unë e dua poezinë e saj, sepse pas shumë leximeve kam arritur t’a kuptoj, ia kam bërë autopsinë me një ndjenjë tmerri, por si triumf të logjikës njerëzore që gjen forca për të përballuar të keqen. Kjo poezi mendimtare të vë në dyshim, të detyron t’i rikthehesh, të vërtetosh, të përjashtosh, të mbledhësh numrat që ndoshta s’do të të japin kurrë shumën e dëshirueshme, por e shoh përherë si një triumf. Ne nuk dimë asnjëherë ku na përgjon një shpërthim i nëndheshëm, por duhet të jemi gati për t’a pritur. Kështu e përjetova unë poezinë e Armelës dhe dua të shoh edhe më tej përmes vështrimit të saj të ngulmët një horizont tjetër të poezisë. Ne po shkallmojmë diçka brenda vetes për të pohuar se ç’ka na pret përpara nuk është një rastësi, por ishim vetë ne që dërgojmë zbulues inteligjentë të mendjes sonë, për të njohur territoret e reja të mendit njerëzor.