Jahja Drançolli: Konferencën Shkencore - "Transformimet dhe Zhvillimi i Qendrave Urbane në Trevat Shqiptare gjatë Antikitetit të Vonë dhe Mesjetës

Jahja Drançolli: Konferencën Shkencore - "Transformimet dhe Zhvillimi i Qendrave Urbane në Trevat Shqiptare gjatë Antikitetit të Vonë dhe Mesjetës

Instituti i Historisë "Ali Hadri, Prishtinë  dhe Departamenti i Historisë në Universitetin e Prishtinës organizuan sot, më 26/09/2025,  Konferencën Shkencore me titull: "Transformimet dhe Zhvillimi i Qendrave Urbane në Trevat Shqiptare gjatë Antikitetit të Vonë dhe Mesjetës"

Nga Jahja Drançolli

Hulumtimi im për këtë konferencë shkencore shqyrtoi zhvillimin e jetës konsullore në qytetet e Kosovës midis viteve 1332 dhe 1455, duke e vendosur atë brenda kontekstit më të gjerë të marrëdhënieve diplomatike dhe tregtare të mesjetës së vonë.

Fokusi është në rolin e konsujve të Republikës së Raguzës në qendrat urbane si Prizreni, Novobërda, Prishtina, Trepça, Peja/Forno, e ndonjë tjetër, të cilët kontribuan në konsolidimin institucional, ligjor dhe ekonomik të kolonive të huaja tregtare. Përmes analizës së burimeve historike dhe qasjeve krahasuese, hulumtimi shqyrton ndikimin e diplomacisë së Raguzës dhe faktorëve të jashtëm në zhvillimin e marrëdhënieve ndërkombëtare në Ballkanin mesjetar. Studimi shkon përtej kufijve tradicionalë të analizës politike dhe ekonomike, duke përfshirë gjithashtu faktorët mjedisorë, shëndetësorë dhe arsimorë që formësuan jetën e përditshme në qytetet mesjetare të Kosovës. Ai hedh dritë mbi organizimin urban, përbërjen sociale dhe demografike të qyteteve, si dhe marrëdhëniet midis zonave urbane dhe rurale. Prania e kolonive të huaja, infrastruktura mjedisore dhe shëndetësore, së bashku me rolin e institucioneve arsimore dhe fetare, janë tregues të rëndësishëm të kompleksitetit të jetës qytetare gjatë kësaj periudhe. Themelimi i konsullatës së parë në Prizren në vitin 1332 shënon një pikë kthese në institucionalizimin e marrëdhënieve tregtare dhe diplomatike, duke dëshmuar për rëndësinë strategjike të rajonit në rrjetin ndërkombëtar të Mesjetës së vonë.