Luan-Asllan Dibrani: Si radikalizmi islamik po shfrytëzohet për të rrënuar Kosovën nga brenda

Imami i BIK-ut-ISIS-it dhe spiuni i Serbisë: Si radikalizmi islamik po shfrytëzohet për të rrënuar Kosovën nga brenda

Nga Luan-Asllan Dibrani

Rrjeti i errët: Si po përdor Serbia ekstremizmin fetar për të destabilizuar Kosovën – dhe pse ky grup duhet shpallur organizatë terroriste

Zbulimi i lidhjeve të Hysri Selimit imam  i Bik-ut me Agjencinë e Inteligjencës Serbe (BIA) dhe kaluara e tij si pjesëtar i ISIS-it, ka zbuluar një rrjet të strukturuar që përbën rrezik të lartë për sigurinë kombëtare të Kosovës. Ky rrjet, i përbërë nga individë të radikalizuar dhe të rekrutuar nga shërbime të huaja armiqësore, nuk është më thjesht problem individual – është një strukturë hibride spiunazhi dhe terrorizmi që meriton të shpallet organizatë terroriste.

Një rrjet i  strukturuar dhe  i radikalizuar me  akte veprimi te një  organizate terroriste

Hysri Selimi nuk është një emër i panjohur. Ish-pjesëtar i BIK-ut dhe ISIS-it, i kthyer në Kosovë në vitin 2022, ai është tashmë në paraburgim nën dyshimet e rënda për spiunazh në shërbim të Serbisë. Sipas dosjes së Prokurorisë Speciale, ai ka qenë i përfshirë në:

Raportim të aktiviteteve të policisë së Kosovës ndaj BIA-s,

Shpërndarje informacioni për individë të radikalizuar,

Ndihmë për ngritjen e strukturave fetare ilegale,

Marrje pagesash nga Serbia për çdo informacion të transmetuar.

Rasti i tij është vetëm maja e ajsbergut. Të dyshuarit e tjerë, si Bedri Shabani, Muharrem Qerimi dhe Jelena Gjukanoviq, tregojnë një model operimi që përfshin dhe vrasja e rreshterit ne Kaçanik, argumente qe te shpallet si organizate terroriste:

Arrestimi i Hysri Selimit, një ish-pjesëtar i organizatës terroriste ISIS dhe aktualisht i dyshuar si spiun i Agjencisë së Inteligjencës Serbe (BIA), është shumë më tepër se një rast individual. Ky është një alarm kombëtar. Është dëshmi se Serbia, përmes veglave të radikalizuara dhe nën petkun e fesë, po punon për të destabilizuar shtetin e Kosovës nga brenda. Dhe tragjikisht, kjo po ndodh me heshtjen, në mos bashkëpunimin pasiv, të një pjese të Bashkësisë Islame të Kosovës.

1. Nga ISIS-i në shërbim të Serbisë – Një agjent me dy fytyra

Hysri Selimi nuk është thjesht një “i penduar” i ISIS-it. Ai është profili klasik i një ekstremisti fetar të shndërruar në agjent aktiv të një shërbimi armiqësor. Pas kthimit nga Siria, ku kishte shërbyer si administrator për organizatën terroriste ISIS, ai nuk u rehabilitua, nuk u izolua, nuk u mbajt nën mbikëqyrje. Përkundrazi, u lejua të operojë lirshëm, duke u rikthyer në një rrjet të ri: atë të BIA-s serbe.

Bashkëpunimi i tij me inteligjencën serbe përfshin raportime të detajuara për arrestime në Kosovë, lëvizje të individëve të dyshuar si radikalë, ndërtimin e xhamive ilegale jashtë kontrollit të institucioneve, si dhe mbledhjen e të dhënave mbi figurat politike dhe institucionale.

2. Serbia dhe strategjia e islamizimit politik të Kosovës

Kjo nuk është hera e parë që shërbimet serbe përpiqen të paraqesin Kosovën si “vatër të radikalizmit islamik”. Por tashmë duket se nuk mjaftohen me propagandë. Ato po investojnë drejtpërdrejt në ndërtimin e këtij imazhi, duke infiltruar figura të radikalizuara si Selimi për të krijuar terren për destabilizim.

Serbia ka interes strategjik që ta paraqesë Kosovën si shtet të dështuar, të islamizuar dhe të rrezikshëm për sigurinë rajonale. Dhe çfarë mënyre më efikase sesa përmes bashkëpunimit me fanatikë fetarë të cilët vetëquhen "aktivistë islamikë", por në realitet janë vegla të inteligjencës serbe?

3. Bashkësia Islame – heshtje që e bën bashkëfajtore

Një ndër aspektet më të frikshme të këtij rasti është mungesa e reagimit të Bashkësisë Islame të Kosovës (BIK). Deri më sot, ky institucion nuk ka ndërmarrë asnjë hap konkret për të hetuar, ndëshkuar apo distancuar veten nga rrymat ekstremiste që kanë vepruar nën hijen e saj.

A janë të gjithë në BIK radikalë? Sigurisht që jo. Por mosreagimi i tyre ndaj rasteve si Hysri Selimi i kthen në bashkëfajtorë moralë. BIK nuk mund të fshihet më pas deklaratave të buta. Ka ardhur koha të dalin haptas dhe të deklarojnë se cilën anë mbajnë: atë të ligjit dhe shtetit, apo të heshtjes përballë shërbimeve të huaja dhe ekstremistëve fetarë?

4. Rrjet më i gjerë – kush janë bashkëpunëtorët?

Selimi nuk ka vepruar vetëm. Ai është pjesë e një strukture të organizuar që ka për qëllim ndërtimin e xhamive ilegale, indoktrinimin e rinisë dhe krijimin e një rrjeti të ndërlidhur fetar e informativ në shërbim të interesave të Serbisë dhe kundër stabilitetit të Kosovës.

Çdo ndërtim fetar pa leje, çdo predikim që vjen nga persona të panjohur për institucionet, duhet hetuar. Radikalizmi nuk luftohet vetëm me arrestime – ai duhet shkulur që në rrënjë, përfshirë rrjetet që e mbështesin nga brenda territorit të Kosovës, nën petkun e organizatave humanitare apo fetare.

Përfundim: Koha për të vepruar, jo për të heshtur

Rasti Selimi është kambanë alarmi. Ai e nxjerr lakuriq një realitet të rrezikshëm: ndërsa ne flasim për integrim evropian dhe zhvillim demokratik, brenda Kosovës po rriten rrjete të ideologjive të huaja, të financuara nga armiq të shtetit, që përdorin fenë si armë politike.

Kjo nuk është më çështje fetare – kjo është çështje kombëtare.

BIK duhet të japë llogari për heshtjen e tij. Institucionet e drejtësisë duhet të shkojnë deri në fund me hetimin e të gjithë rrjetit që qëndron pas Selimit. Ndërsa qytetarët e këtij vendi duhet të kuptojnë se radikalizmi, në çfarëdo forme që shfaqet, është kërcënimi më i madh për lirinë dhe shtetin tonë.