Neshat Mehmedi: Memetali Zenuni, veprimtari i palodhur në Velika Goricë - Kroaci

Kurrë s’e kisha menduar, e asnjëherë s’e kisha marrë me mend se një ditë do të jem pjesëmarrës personalisht në karnavalet që organizohen në qytetin e Velika Goricës. Me thënë të drejtën as që kisha dëgjuar apo lexuar më parë për këtë organizim shumë madhështor që organizohej nga Drejtoria e Bashkësisë Turistike dhe nga qyteti. Asnjëherë s’e kisha ëndërruar më parë se një ditë do më bëjë ftesë që personalisht të marrë pjesë në këto karnavale tetovari, humanisti, frymëzuesi dhe atdhetari Memetali Zenuni.

MEMETALI ZENUNI, VEPRIMTARI I PALODHUR

NË VELIKA GORICË – KROACI

Nga Neshat Mehmedi

Më 12 shkurt 2023, ora 15:33 më shkruan: “Mirëdita z. Neshat! Shpresoj të jeni shëndosh e mirë Ju me gjithë familjen Tuaj!

Më 18.02.2023, këtu, në rrugën kryesore kalon defileu i karnavalit të këtij qyteti, ku punojmë ne familjarisht në Velika Goricë afër Zagrebit. Këtë karnaval e organizojnë Bashkësia Turistike qytetit së bashku me komunën. Ky manifestim është njëditor.

Unë kam biseduar me drejtoreshën e turizmit znj. Maja Toth, që vitin e ardhshëm 2024 të merrni pjesë Ju me shoqatën “Karnavalet Ilire”.

Kur të keni kohë më thirrni në telefon dhe të bisedojmë më hollësisht rreth karnavaleve.

Ju përshëndet miqësisht, Memetaliu!

Pasi lexova shkrimin, menjëherë e thirra në telefon Memetaliun, edhe pse e kam mik në FB, po kurrë më parë s’kemi biseduar e as që jemi takuar fizikisht. Pasi u përshëndetëm, biseduam më hollësisht për organizmin e karnavaleve.

Neshat, unë mendoj se është mirë të vini dy a tri ditë përpara, më 18.02.2023 të shikoni nga afër se si organizohen karnavalet këtu dhe në këtë ditë do të kemi një takim me drejtoreshën Maja Toth, për të biseduar për “KARNAVALET ILIRE”, që organizohen në Bozovcë dhe Tetovë.

Unë nxora biletën kthyese te agjencioni turistik Hisar Turist. Nisja nga stacioni i autobusëve në Tetovë, të premten, pas dite, më 17.02. 2023, ora 16:00. Nëpër kufinj s’kishte shumë udhëtarë e as ngarkesë komunikacioni. Memetaliut i telefonova në ora 04:00 në mëngjes afër Zagrebit, për t’u takuar më ora 4:30 min. Aty më priste Memetaliu, një njeri shumë modest. Buzëqeshja e tij flet shumë bashkë me mikpritjen dhe bujarinë janë vlera të traditës shqiptare të trashëguara brez pas brezi deri në ditët tona. Pra, Memetaliu është mik i dashur, veprimtar me nxitje të mëdha, është frymëzues i kalitur, është shembull se si çmohet atdheu e si respektohen etnitë tjera!

Mirësjellja e tij është shkalla më e lartë e moralit. Një qytet i tërë e nderon dhe e respekton, kudoqoftë. E respektonin dhe nderonin gjatë rrugës pleq e plaka, burra e gra, të rinj e të reja, edhe vogëlushët E tërë kjo është fryt i thjeshtësisë dhe bujarisë së tij familjare.

E KUSH NUK DËSHIRON TË JETË SI MEMETALI ZENUNI

Aq modest, i urtë, i kompletuar dhe intelektual! Largpamës si shqiponja, durimtar si lisat gjatë stinëve, tolerant, bashkëpunues, humanist, mikpritës e bujar, sakrifikues e mbi të gjitha guximtar e atdhetar! Për të gjitha këto flasin veprat e tij anembanë trojeve tona.

Zoti të bekoftë familjarisht!

INICIUESI I TAKIMIT- MEMETALI ZENUNI

Më 18 shkurt 2023, me iniciativë të veprimtarit Memetali Zenuni u mundësua takimi me znj. MAJA TOTH, Drejtoreshë e Bashkësisë së Turizmit, në Velika Goricë. Pata nderin të bisedojmë për manifestimin madhështor që do organizohej në këtë qytet në të njëjtën ditë, si dhe për KARNAVALET ILIRE. Drejtoresha u interesua më shumë për strukturën e karnavalit, aktiviteti dhe periudha kohore e organizimit. Unë i dhashë sqarime për të gjitha këto në mënyrë të detajuar. Në shenjë respekti ia dhurova një kopje të librit tim “KARNAVALET ILIRE”. Drejtoresha më falënderoi për bisedën konstruktive, për librin e dhuruar si dhe për praninë time për të marrë pjesë në Manifestimin Kulturor që do organizohet në këtë ditë në orën 14:00. Ajo na ftoi që vitin e ardhshëm 2024 të jemi pjesëmarrës në Manifestimin e Karnavaleve të Velika Goricës.

Pas përfundimit të bisedës, drejtoresha na shoqëroi deri te objekti përballë rrugës, ku ishte i stolisur dhe na ftoi bashkë me z. Memetaliun të hipim në katin e parë dhe të shikojmë nga ballkoni, ku duken më mirë karnavalistët që do të parakalojnë.

KARNAVALET NË VELIKA GORICË- KROACI, më 18 shkurt 2023

Falënderoj mikun tim z. Memetali Zenunin, humanistin e përmasave mbarëkombëtare, dashamirin e kulturës, arsimit, sportit dhe vlerave të trashëgimisë, falë iniciativës dhe këmbëngulësisë së tij, unë personalisht arrita të jem pjesë e këtij manifestimi madhështor që u organizua në qytetin e Velika Goricës.

Edhe pse ishim të njoftuar se në sa ora do të fillojë parada “defileu”, rastësisht duke bredhur rrugës, aty pash një grup të karnavaleve që shkonin në vendin e paraparë ku do të grumbullohen, edhe nga kureshtja ecja me ta dhe bëja foto. Të gjithë grumbulloheshin në oborrin e një shkolle, këtu mu dha mundësia të bëjë foto të shumta e të bukura, individuale në grupe dhe të shoqatave veç e veç. Shumë grupe të shoqatave nuk u futën fare në oborrin e shkollës, por qëndronin në rrugë. Të them të drejtën u mahnita nga ky organizim madhështor. Nga këtu vazhdova rrugën për te qendra ku do të parakalonin karnavalistët. Nga ballkoni shikohej shumë mirë dhe shumë larg. Moderatori i prezantonte të gjithë shoqatat në mënyrën më të mirë të mundshme.

Në këtë manifestim madhështor, përpos karnavalistëve nga Kroacia, kishte edhe karnavalistë nga Bullgaria.

RESTORANI “MEMY”

Qytetarët e Velika Goricës, sipas traditës, konsumonin ëmbëlsirën shumë të preferuar "Krofne", që e përgatiste ëmbëltorja me traditë shumë të gjatë mbi 77 vjeçare "MEMY", pronë e Memetali Zenunit. Këtu në “MEMY”, qytetarët prisnin në radhë për të blerë ëmbëlsirën shumë të preferuar “krofnen”. Kjo ëmbëlsirë është simbol i këtij qyteti në këtë manifestim. Shumë ngjashëm edhe me Elbasanin, ku qytetarët atje, për nderë të “DITËS SË VERËS”, përgatisin "BALLOKUMET" si ushqim tradicional, kurse ne, gjatë manifestimit “Karnavalet Ilire” përgatisim ushqim tradicional: mish qengji, fli, kaçamak (bakërdar), kos delesh apo ushqime vendore tradicionale.

Memetaliu punën e ka mision. Në restorantin e tij shiten edhe dy ëmbëlsirat shumë të preferuara nga vendorët – kroatët BAKLLAVAJA KROATE – Hërvatska bakllava prej çokollate, shumë e shijshme me vlera ushqyese dhe KROFNE LEDI shpikje të Memetaliut dhe të licencuara nga shteti kroat.

Në restorantin e tij punonin dymbëdhjetë punëtorë e punëtore, shpeshherë ndodhte gjatë punës ditore Memetaliu të bëhet punëtori i trembëdhjetë. Mbi të gjitha dallohej për mikpritjen e ngrohtë të klientëve: Mirëmëngjesi! Mirëdita! Mirëmbrëma! Mirëserdhët! Ju bëftë mirë! Mirëupafshim!

Memetaliu në këtë qytet vjen në moshën 8 tetë vjeçare në vitin 1963, nga Tetova katundi Sedllarcë, Para luftës së dytë botërore vjen axha i tij, më 1946 vjen bashkë me babin e Memetaliut dhe vazhdojnë jetën këtu në këtë qytet. Është e çuditshme dhe shumë e vërtet, picën e parë e ka pru këtu në Velika Goricë, Memetaliu para 43 katërdhjetë e tre vitesh, pra në vitin 1980.

VIZITË NË SHQITARJEVO

Në këtë vendbanim, katund të Velika Goricës, në hyrje të tij, has në pllakatin ku shkruhet Shqitarjevo, vendbanim i pasur me zbulime arkeologjike iIlire. Në hyrje të katundit gjendet kisha “Shën Martinit” që daton nga v iti 1334, e cila është shkatërruar nga osmanlit dhe është rindërtuar në vitin 1642. Së bashku me Memetaliu, mjaft ambicioz, arritëm në këtë katund, ku është zbuluar ky vend arkeologjik. Gjatë rrugës më tha: “ Të vish në Velika Goricë, e mos e vizitosh vendbanimin ilir të zbuluar në këtë katund, është mëkat!” Për fatin e mirë Televizioni “Top chanel” ka bërë një dokumentar ku flet Memetali Zenuni. Jep sqarime të detajuara për këtë vendbanim të lashtë ilir. Në këtë vendbanim arkeologjik bëmë disa foto. Aty afër këtij katundi kalonte lumi “Sava”, të cilin shkuam për ta parë më për së afërmi.

NË ZAGREB U FESTUA DITA E PAVARËSISË SË KOSOVËS

Më 18 shkurt 2023, në qytetin e Zagrebit në Kroaci, shoqata kulturore shqiptare “SHKËNDIJA” për nderë të Ditës së Pavarësisë të Republikës së Kosovës, organizoi manifestim kulturor, ku ishin të pranishëm mërgimtarë, veprimtarë e personalitete anë e mbanë trojeve shqiptare. Në këtë manifestim ishin të pranishëm edhe ambasadorët: nga Republika e Kosovës, Republika e Shqipërisë dhe Maqedonia Veriore.

Falënderoj veprimtarin Memetali Zenunin, që ma mundësoi të isha pjesëmarrës në këtë manifestim madhështor.

PËRCJELLJA DHE SHËTITJA NËPËR ZAGREB

Të dielën pas dite me Memetaliun u nisëm për në Zagreb nga Velika Gorica, pasi u përshëndetëm sipas traditës tonë shqiptare me familjen e tij. Rrugës Memetaliu po më tregonte për fëmijërinë e tij si kishte lëvizur me biçikletë, shitjen e akulloreve nëpër këta vendbanime , afër këta objekte që shikoni këtu, dikur ishin fushë, ndryshimet janë shumë të mëdha. Pasi arritëm në Zagreb, parkoi veturën në parking dhe vazhduam të shëtitim nëpër qendrën e Zagrebit. Rrugët e qeta, ndërtesa me arkitekturë të moçme. Restorantet në qendër të qytetit punonin, shumë prej tyre ishin me pronar shqiptarë të rrethinës së Tetovës e të Kosovës. Kaluam atypari në rrugën ku pash mbishkrimin në një plak mermeri Dr. Milan Shuflai, i cili një jetë ia kushtoi Albanologjisë. Në anën e djathë të pllakës së Shuflait ishte një pllakë ku shkruhej Avokat Damir Mikuljan. Në qytetin e Tiranës një rrugë është emërtuar me emrin tij, në shenjë mirënjohje i cili ka ndihmuar për të hequr vizat Shqipërisë!

Pasi shëtitëm nëpër rrugët në qendër të Zagrebit aty afër orës 18:00, pritshim autobusin që të nisemi për në Tetovë. Para se të hipim në autobusi Hisar Turist, u përshëndetëm si miku me mikun dhe më premtoi se do të jem i pranishëm në Karnavalet Ilire në Tetovë.

Memetali Zenuni erdhi enkas nga Velika Gorica për të ndjekur manifestimin Kulturor Karnavalet Ilire. Ai ishte me ne nga shkolla e mesme e mjekësisë “Nikolla Shtejn” deri në sheshin ILIRIA të Tetovës. Aty përshëndeti të pranishmit dhe manifestimin kulturor. Në shenjë respekti ia dhuruam mirënjohjen “KARNAVALET ILIRE”.