Hamza Halabaku: Paritë tona me dallkaukë, lajkatarë, dallaveraxhinj dhe delenxhinj

Paritë tona me dallkaukë, lajkatarë, dallaveraxhinj dhe delenxhinj

(Letër imagjinare mikut tim, shkrimtarit të ndjerë, Zejnullah Halili)

Nga Hamza Halabaku

Zejnullah i dashur,

Tani lutem për Ty: “Zot i madh, vendose Zejnën në vendin më të mirë, atje ku është!” Kujtoj se Zejna e meriton vendin më të mirë, në botën tjetër, nëse ekziston botë tjetër!

Si duket, nuk kam durim që të pres të vijë vera për të të shkruar.

Tani, në fund të muajit janar 2018, mësoj se në Prizren, në xhaminë “Sinan Pasha”, më 1912, imam Adnani, që kishte predikuar për besimtarët e islamit në gjuhën shqipe, paskësh qenë rus. Emri i vërtet i tij kishte qenë Kazimir Olenko. Kështu e ka shkruar anasi ynë, shkrimtari i njohur, Ibrahim Kadriu, në romanin e tij “Misioni rus”. Bile, sipas asaj që shkruan Ibrahimi në romanin e tij, vetë mulla Adnani, para xhematit që e përmenda më lart, e kishte pranuar se ishte Kazimir Olenko dhe pas njëzet vjetësh predikimi paskësh thënë: “Unë jam Kazimir Olenko dhe tani dua të shkoj, se misionin tim si imam në xhaminë ‘Sinan Pasha’ në Prizren e kreva!” Ibrahimi më ka thënë me gojën e vet se ka gjetur dokumente për këtë që ka shkrua në romanin e tij “Misioni rus!”

Për besë, na thoshin edhe gjyshërit tanë, po ne nuk e besonim që ka mundur të ndodhë diçka e tillë!

Tani, pikërisht në atë xhami, imami i saj, i tashëm, Mustafa Tombash, si duket është nga Turqia. E sheh që edhe tani, fenë po na e predikon një i huaj, sikur në vitin 1912. Këtu, pra, pas faljes së namazit të jacisë (është lutja e fundit që bëhet pas darkës), është organizuar “lutja e fitores”, që i bie se qytetarë të Prizrenit, përfaqësues të organi­zatave të shoqërisë civile, si dhe ushtarët turq në Kosovë, pas leximit të Kuranit, janë lutur për ush­tarët që të arrijnë fitore në operacionin e nisur nga Forcat e Armatosura Turke (TSK), diku në Siri e ku po luftojnë kundër popullatës së pafaj­shme kurde. Pra, lutja është bërë për t’i mbësh­te­tur forcat turke në luftën kundër kurdëve të pafaj­shëm!

Po i luten Zotit që të fitojë i forti në tokën e huaj! O Zot, bash shqiptarët, që para tetëmbë­dhjetë vjetësh nuk mund të gjenin vend nga forcat para­mi­litare e ushtarake të Serbisë së Millosheviqit, ma­rrin pjesë në një lutje të këtillë!?

Më lejo, të lutem i dashuri Zejnuallah, të ta përshkruaj një shkrim nga Kurani.

Në Kaptinën 9:107 të Kuranit shkruan: “(nga hipokritët më të shëmtuarit janë) edhe ata që ndërtuan xhami sherri, mosbesimi e përçarjeje mes besimtarëve dhe ftuan në pritje (solemne) atë që më parë kishte luftuar kundër Allahut dhe të dërguarit të tij. Ata do të betohen: ‘Ne nuk kemi pasur tjetër qëllim, vetëm për të mirë!’ Po Allahu dëshmoi se ata vërtet janë rrenacakë”.

Nuk duhet t’u besohet të gjithë imamëve, o miku im i mirë!

Këtu te ne, tani për tani, gjithandej ku jetojnë shqiptarët, edhe nëpër xhami, edhe nëpër udhëheqje politike, ka dallkaukë edhe lajkatarë, edhe dallave­raxhinj, po edhe delenxhinj, që besa janë vendosur në maja të majave të pushtetit.

Pas lutjes në xhaminë “Sinan Pasha” në Prizren, siç të shkrova më lart, Qeveria jonë ka thënë se ajo “është e përkushtuar për paqen dhe sta­bilitetin kudo në botë dhe kundër çdo nxitjeje të urrej­tjes dhe përfshirjes së shtetasve të Kosovës në konfliktet jashtë vendit!”

Këtë tekst e kam marrë në një portal, i dashur miku im Zejnullah. Ky është qëndrimi i Qeverisë sonë. Si duket, nuk ka dëshirë Qeveria të ballafaqohet me Bashkësinë Islame të Kosovës. Pse, do të thuash ti?

Sepse nuk do të ketë vota në zgjedhjet e ardhshme!
*

Të njëjtën ditë, më duket, Sheshi Skënderbe në Tiranë është mbushur me qytetarë që po pro­testojnë kundër qeverisë Rama. Ti do të thuash, është normale protesta, kur populli është i pakëna­­qur. Në rregull, pajtohem edhe unë, po, ama këta të qeverisë kur ishin në opozitë çoheshin në pro­testa që i organizonin politikanët, e vriteshin qyte­tarët. Nuk e di a jam i qartë, në këto rrëfime, për këto punë të pahijshme që po ndodhin ndër ne shqiptarët. Në protesta çohen përherë ata që janë në opozitë, se këta në qeveri nuk i kanë shumë keq punët e veta.

Është neveritëse të dëgjosh çka thonë për njëri-tjetrin.

*

Më 26 janar, të këtij viti, në Kuvendin e Kosovës, në Prishtinë, ka qenë një cirk i vërtetë. Ishte mbledhja e parë në këtë vit! Një deputet i akuzon të tjerët, normal, se po bëjnë ahengje e po shtien me revole e pushkë automatike për asgjë - hiç. Po pinë raki e po hanë meze të nxehtë e po shtien e po shtien... Më duket as gjatë luftës nuk kanë harxhua aq fishekë, sa po harxhojnë në ahengje! Ky deputeti, duke i kritikuar, u thoshte: “Me meze e raki njeriu bëhet trim edhe pa qenë trim hiç!”

Pastaj çohet ai tjetri, kishe po i mbroj shokët e partisë së vet, duke i thënë:

“Prite tash ti, se vetë e lype... Ju, në partinë tuaj, kishe në VV, me bar po bëni orgji seksuale”! Hahahaha, më vjen për të qeshur me kësi cirkusi. As kur kemi qenë barinj e kemi luajtur guxhas, nuk kemi përdorur këso fjalësh në fushë, e le më në sallën e Parlamentit tonë në Prishtinë, para kamerave televizive...

Shpesh po e pyes veten: A mund të na bëjë keq dikush më shumë se ne vetvetes...? Baba më thoshte, biro po ta bëri dikush të keqen, shpëton diqysh, por, ama, po e bëre të keqen vetë për vete, nuk ka kush si të të shpëtojë...

*

Ka përçarje, gati, në të gjitha partitë tona politike. Përçarje brendapërbrenda partive! Edhe në PDK, edhe në LDK, është normale të ketë për­çarje të vogla. Nuk mund të mendojnë të gjithë njësoj. Kështu e ka pluralizmi! Jam i befasuar me ato përçarjet e këtyre të rinjve. Vetëvendosje po e quajnë ata partinë e vet. Donin t’i bashkonin të gjithë shqiptarët, kudo janë. Kështu thoshin se e kanë programin e tyre! Jo, more, tani ata janë sharë ndër vete e janë përçarë keq! Janë ndarë në dy grupe.

Kush po na i bën këto të këqija, nuk e di. Ama, keq e kemi punën.

Po kush? Vetë, more, vetë! Mbrëmë mora vesh se njëri nga zëvendëskryeministrat e paska të birin, në njërën ministri, zëvendësministër apo më duket shef të kabinetit të njërit ministër?! Baba zëvendëskryeministër e i biri zëvendësmini­stër...!!! E tërë familja nëpër ministri!

Mësova se një intelektual kishte thënë, edhe këtë e lexova në një shkrim të një portali, “u kërkoj falje publike fëmijëve që i lashë në Kosovë! E unë po mendoj shpesh, pse nuk i mora të gjithë fëmijët me vete, këtu ku jam. Po edhe eshtrat e babës dhe të nënës që më kanë vdekur, pse i lashë aty!”

Nuk i kemi punët mirë. I forti të bën çka të dojë dhe nuk i përgjigjet askujt!

*

Hajni në krye të shtetit, po edhe hajni në xhepat e qytetarëve, prej këtyre hajnave të rrugëve. Këta janë të vegjël, po të lënë keq, more Zejnullah i dashur!

- O, na kanë ardhur kohë shumë të rënda!!!

Ditëm drekë, në mes të sheshit, para shta­tores së Zahir Pajazitit, hajnat plaçkitin! Hajna nga të sillesh. Dheun nën këmbë ta vjedhin!

Tani, haptas duket se ka edhe grupe të organizuara hajnash.

Po, a nuk kishte të drejtë kur një miku im, Sylë Bajrami, në përmbledhjen e tij me vargje “Një copë atdhe” në f. 163 shkruante: “Dikush vjedh me gishta; dikush vjedh me letër; ne, këtë farë zanati; e kemi bukur të vjetër”.

Tani, një qytetar kishte thënë: “Dikur më ka ardhur marre që kam qenë hajn, e sot po më vjen marre që nuk jam më i madh se këta”!

Pra, i dashuri Zejnullah, te ne është një kohë, jo siç e kemi pritur!

Një miku im, sa isha në Prishtinë, më tha kështu:

“Qeveria që e mban pushtetin duke vje­dhur pare, e qet miletin fare!”

*

Zejnullah i dashur, nuk mundem pa t’i kujtuar edhe disa vargje të rilindësit tonë, Ali Asllani. Ai në vargjet e tij në “Vepra” 2, botimi “Rilindja” - Redaksia e botimeve Prishtinë, 1984, në faqen 94 shkruan:

“Dallavera nëpër zyra, dallavera në pazar,

Dallavera me të huaj, dallavera me shqiptar`

Vetëm vetëm dallavera, dhe në dëm të këtij vëndi

Që ju rriti, që ju ngriti, që ju ngopi, që ju dëndi!”

Po e lë strofën vijuese dhe po kaloj në tjetrën!

“Dhe kujtoni tash e tutje me të tilla dallavera

Kukuvajka do përtypi zog e zoga si përpara...

Ja, ja, grushti do të bjerë përmbi krye të zuzarëve,

Koha është e maskarenjve, po Atdheu i shqiptarëve!”

*

Dëgjo, dëgjo, një deputete e një partie të Parlamentit të Shqipërisë, duke diskutuar, u kishte thënë deputetëve të pozitës, në një mbledhje komi­sioni parlamentar, “ju nuk jeni burra”. Kurse ky “burri”, deputeti i partisë në pozitë, gjatë disku­timit ia kishte kthyer koleges deputete: “kur ua ke provuar deputetëve burrërinë”! Na provo!” Demek, na provo a jemi burra a jo...!!!

Eee, more Zejnë. Poshtë na ka rënë katundi! Kush është bërë deputet ta dije! Do të të tregoj ndoshta në letrën tjetër! Nuk po flas veç për Tiranën, por edhe për Shkupin e për Prishtinën!

“Qeveria që e mban pushtetin duke vje­dhur pare, e qet miletin fare!”, më ka thënë një ditë ish-mësuesi yt e miku im, tanimë i ndjerë, Rabit Rexhepi!

Dritë paç, o miku im i mirë!

(Nuremberg, fundi i janarit 2018