Kastriot Dervishi: I vrarë në Repartin nr. 309 Laç

I vrarë në Repartin nr. 309 Laç

Nga Kastriot Dervishi

Eqerem Zeko, i vitlindjes 1910, nga lagja “Palorto” e Gjirokastrës u arrestua më 14.9.1949. U dënua me vdekje, në një proces të madh me 9 persona të tjerë në një proces thellësisht fals. Dënimi iu kthye me burgim të përjetshëm e punë të detyruar. Ishte 54 vjeç kur u vra më 24.8.1964, ora 9.50 duke vuajtur dënimin në Repartin nr.309 Laç. Me një karrocë dore po hidhte mbeturinat në një gropë brenda rrethimit të kampit, kur u qëllua për vdekje me një breshëri plumbash. Në foto, ai duket i shtrirë dhe me kapele në kokë, gati në mes të kampit, çka hidhte poshtë aludimin se kishte kaluar vijën e ndaluar.

Ushtar Ramiu që e vrau u arrestua më 12.10.1964. Gjykata e dënoi me 2 vjet heqje lirie, duke e justifikuar masën e vogël me moshën e tij të re, "nivelin e ulët kulturor dhe përbërjen e mirë familjare". Binte në sy fakti se gjykata nxori në pah faktin se ushtari kish qëlluar pa paralajmërim, ndërsa në raportin e parë të ngjarjes ishte thënë ndryshe nga komanda. Thuhej se Eqeremi fliste me të dënuarit për jetën e mëparshme të diktatorit në qytetin e tij të lindjes.