Kadri Kadiu: Nëna ia di hallin djalit

NËNA IA DI HALLIN DJALIT

(Marrë nga Libri "Dheu që dhemb" i Kadri Kadiut)

Devolleshë e bukur shumë, ma ke lënë djalin pa gjumë

Thëllëzë e bukur e malit, ç'mi ke bërë kështu djalit?

Që të do moj ty aq shumë, gjithë natën rri pa gjumë

Po ma tret, po ma sëmur, ku e ke gjithë atë nur?

Nënë, ç'faj kam unë e mjera që nuk të fle ty pëllumbi

Gjithë natën unë shoh ëndrra, edhe qaj kur më del gjumi

Edhe qaj kur më del gjumi, se ëndrra më bëhet zhgjëndërr

Se në ëndërr isha nuse, dhe yt bir më ishte dhëndër

Ah moj ëndërr, pse më ike, zemrën time e zhurite

E zhurite, e coptove, djalin që dua ma largove

Si qiriri unë po digjem, vallë me djalin kur do piqem?

Kur do piqem të nxjerr mallë, e të nxjerr me të sevdanë?

Çupë e bukur devolleshë, çudite gjithë dynjanë

Punëtore porsi bletë, e bukur je si një zanë

Kur më hyn moj ti në magje, bie erë manushaqe

Kur më hyn moj ti në valle, më kërcen porsi sorkadhe

Ah moj çupë, zanë e malit, ia zhurite zemrën djalit

Po nëna hallin ia di, idhulli i tij më je ti

Të keqen, mos ma mundo djalën, jepja besën, jepja fjalën

Ki gjynah nga Perëndia, marrçi nga ditët e mia !