Albert Habazaj: Mësuesit e mi

MËSUESIT E MI

 

Albert Habazaj

 

Kur nxënës ne kemi qenë

Mësuesi quhej prind i dytë,

Dinjiteti i tyre kishte vlerë,

Si mësuesit s'kishte të dytë.

 

Ata qenë të mençur shumë,

Qenë si male hyjnorë,

Ata qenë diell në furtunë,

Një nga një u bën' meteorë.

 

Mësuesit më ikën një nga një,

Fisnikët e mi të lartë,

I kam, dhe pse s'ua dëgjoj atë zë,

Në frymëmarrjen time dit' e natë.

 

Ku t'i gjej t'u puth fjalën

Siç puth Dheun e Flamurin,

Si bregu i detit pret valën

Pres urtësinë e tyre të Burrit.

 

Mrekulli mund të ndodhë vërtet

Të bëhem sa një e mijta e tyre,

Ata erdhën e ikën profetë,

Dhe zbukurojnë qiellin me yje.

 

Për nxënësin qe emri Mësues

Baras me Perëndi, Zotërues.

 

Dritanët e mi dritërofshin e të paharrueshëm qofshin,

Mësuesit e sotshëm rrofshin e përparofshin!

 

Nderim nga Universiteti "Ismail Qemali", Vlorë, Albert Rexhep Habazaj

 

07. 03. 2017

 

PERLA JONË, MJALT I MJALIT

 

Zonjushe e bukur, Perla

Që jetën na mbush me mjalt,

Si anije e bardhë me vela

Po nis udhëtim të gjatë.

 

Me mjalt po na e mbush jetën,

Perlushe, moj drit’ në sy,

Siç ësht’ kosherja për Bletën,

Ësht’ gjyshi dhe gjyshja për ty!

 

Sot u bëre më e madhe,

Si i vogël, me ty luaj,

Sot do ta djegim fare:

Perla mbushi tetë muaj!...

 

Eda dhe Niku të lumtur

Zotërojnë botën e tyre,

Perla jetën më të bukur

Ua mbush me dritën e syve.

 

Sa shumë të kanë xhan Gjysh poeti dhe Gjyshe inxhinieria, moj Perlushe, o sy i bukur drenushe!

 

Vlorë, e premte, 03. 03. 2017

 

DHJETË SHQIPONJAT E TËRBAÇIT

 

Vallja - kurorë dafine

për dhjetë shqiponja mali,

dhjetë tufa trëndeline,

lum Tërbaçit, kush ia fali!

 

Janë vajzat e Tërbaçit,

Si shtojzovalle të këngës,

Kënga, kaluar ilaçit,

Flori shpirti, mjalt i zemrës.

 

Për këngën - dy labe zonja,

Nuse si lulet në baçe,

Bashkë me tetë shqiponja,

Porsi dhjetë Miro Tërbaçe.

 

Në këngë porsi thëllëza,

Në valle porsi shqiponja,

Mbushur diell ato rrëza,

Bekim i nënave tona.

 

*) drejtues artistik i Grupit të Vajzave të Tërbaçit, Vlorë, ALBANIA

Vlorë, e mërkurë, 01. 03. 2017