Prend Buzhala: Zëri lirik i lules

Zëri lirik i lules që ligjëron tek rrufet

(Fatmire Duraku: “Vagëllim mbi ujë”, poezi botoi FAD, Prishtinë 2006)

Nga Prend Buzhala

LIBRI POETIK “Vagëllimë mbi ujë”  i krijueses së re Fatmire Durakut (është lindur më 1974), jep edhe një dëshmi tjetër në favor të artit e të përkushtimit  krijues: e ndiejmë pjekurinë krijuese, e cila na bind për një përvojë të së bukurës , si kategori estetike. Krijuesja e re Fatmire Duraku, tashmë e ka krijuar profilin e sa artistik, duke shkruar me ngulm si prozën, kryesisht zhanrin e romanit, ashtu edhe poezinë. Ajo deri më tash ka botuar romanet “Te vorri i Çikës” ,  Fshehtësia e tre shpirtërave” dhe “Plepi i thyer”, si dhe librat me poezi  “Pse ike kur më puthe” dhe “Vjedhësi i çasteve”.

I ndarë në pesë cikle(Prerja e lisit të shtëpisë”, “Molla e dehur luhatet në pe”, “Vyshkja e lules në katër pamje”, “Vallëzimi me vdekjen”),  ky vëllim e shquan prirjen për tërësinë, por e shquan edhe profilin krijues  në disa rrafshe: në rrafshin e kohezionit ndjenjor-lirik, në atë të fshehtësisë poetike, , në antonimin e këndimit palador e elegjiak, evokim lirik i të ndodhurave.  Aty-këtu nxjerrin kokë motivet kryengritëse  të shpirtit ,  kurse përgjatë gjithë vëllimit të duket se ligjëron,  vallëzon, proteston, vetmohet a evokon zëri i një luleje brenda subjektit poetik:

Dy grushte dhe për lulen time

Që priste të bënte jetë të re në mua

Mes muresh të kullës

Në dritaren e vogël

(poezia “Lulja dhe rrufeja”, eq 36)

Dhe po këtë zë brenda një zëri e këtë musht lirik këndimi, e pleksin edhe leksemat tjera poetike: uji që i bie gurit, deti që është një zogë i ndezur, kaltërsia, zogu në qiell, kitara, heshtja, pamjet e peizazhi, lisi, zjarri i vjetër... e kush na qenka ky zjarr? Është ajo kika poetike që e mban shtyllën e qenies ekzistenciale.  Do theksuar se poetja një cikël të tërë e shkruan me trioleta, zhanër ky kaq i rrallë në poezinë tonë që nga Lasgushi e këndej. Është shpirti i poetes që vagëllon si një zë hyjnor mbi ujë. Kontrastim  interesant, apo jo!