Demir Krasniqi: Parku i paqes - thera e kaçes

Demir KRASNIQI :

PARKU I PAQES – THERA E KAÇES

Mbi Urë t’ Ibrit – Parku i Paqes ,

Është i mbjellë me thera t’ kaçes !

Lumi i larjes – muri i ndarjes ,

Vend i krimit dhe përçarjes !...

Qanë Kozmaçi e Qyqavica –

Na ka ra kerri në spica !...

Na u kanë shqye defe e mezhnica –

Po na ndahet prapë Mitrovica !

Po pëllet lopa e po pëllet viçi –

Po na vjen Millosh Obiliqi !

N’ Fushë Kosovë janë mbledhë xhemati –

Po na vjen Sulltan Murati !

Qanë Lumëbardhi e Shatërvani –

Po na  kthehet Car Dushani !

Hingëllon kali e pëllet gomari –

Po na kthehet Car Llazari !

Janë tharë lulet , dardha e molla –

Po na kthehet Kral Nikolla !

Gjëmon fusha e gjëmon mali –

Po na kthehet Drazhë Mihajli !

Është tharë rrushi , është tharë fiqi –

Po na kthehet Çubrilloviqi !

Ulërinë Gazimestani –

Po na kthehet Sllobodani !...

Gjilan, më 25 . 06. 2014 .