E marte, 15.06.2021, 02:47 AM (GMT+1)

Lajme

Djalin ma manipuluan, nuk është terrorist

E merkure, 13.11.2013, 08:36 PM


Nga Selvije Bajrami

(E plotësuar)E mban mjekrën e gjatë e pantallonat e shkurtër, mirëpo Genc Selimi nga Bresalci i Gjilanit nuk ka qenë asnjëherë në Siri dhe si i tillë nuk ka marrë pjesë në luftën e atjeshme.

Të vetmen rrugë jashtëKosovës, Genc Selimi e ka bërë deri në Stamboll ngase përmes një organizate arabe po synonte të studionte në Egjipt.

Kështu së paku thotë për gazetën “Zëri” babai i tij, Hysriu. Djali i tij i vetëm është arrestuar të martën e javës së kaluar në Prishtinë nën dyshimin se bashkë me pesë persona të tjerë, të cilët po ashtu janë arrestuar, po përgatisnin një sulm terrorist, duke kryer kështu veprën penale kundër rendit kushtetues dhe sigurisë në Republikën e Kosovës.

Djali 19 vjeç nga Bresalci, për babanë e tij, nuk është terrorist, ani pse ditën e arrestimit në Prishtinë ai ishte zënë me armë në dorë, përkatësisht me snajper dhe fishekë.

Ai dhe shokët e tij ishin arrestuar pas nëntë muajsh përgjime nga policia, të cilët për të vërtetuar dyshimin e kishin simuluar një rast, ku kishin rënë në kontakt me të dyshuarit të cilëve edhe iu kanë shitur e falur armë.

Babai i Gencit shtron pyetjen se ku i mori paratë djali i tij për të blerë armët, kur e di se djali i tij ka punuar argat në ndërtim dhe si i tillë është paguar dhjetë euro në ditë.

Me tërë mohimet që i bën, Hysri Selimi një ditë pasi që është publikuar arsyeja e arrestimit të djalit të tij, thotë se nuk dëshiron që ta shfajësojë të birin, pasi është zënë me armë. Këtë rast thotë se ia ka montuar Policia, siç thotë ai, për interesa të caktuara.

Për interesa të caktuara edhe grupet ekstremiste, sipas babait, e kanë futur në mesin e tyre edhe djalin e tij. Selimi thotë se djalin ia kanë manipuluar, ndonëse e kishte paralajmëruar për këtë.

“I kemi thanë, kujdes se po manipulohesh. I kam thanë ti je në kurth, i kam thanë ty po të përgjojnë, ty kanë me të shti në lojë, por ai me ka thënë se nuk jam duke bërë asgjë”, thotë Selimi.

“Të jesh e bindur se këta janë manipuluar. Janë manipuluar nga dy shërbime. Unë i quaj shërbime të huaja, por që i kanë njerëzit në Kosovë. Unë i cilësoj si ekstrem, që i kanë njerëzit këtu për qëllime të caktuara të ekstremizmit dhe futjen e urrejtjes ndaj komuniteteve të ndryshme fetare dhe në anën tjetër shërbimet policore të Kosovës”, thotë ai.

Genci u zu me armë në dorë

Hysriu është i shqetësuar me arrestimin e të birit. Nuk e shfajëson por synon që djali të largohet nga ekstremistët, me të cilët është lidhur tash e katër vite.

Ai tregon se Genci ka qenë nxënës në shkollën e mesme të Medresesë “Alaudin” në Gjilan. Në vitin e tretë, Genci i lindur më 1994, e kishte ndërprerë shkollimin aty. Në kërkim të një jete më të mirë. Hysriu thotë se si prind ka punuar tërë kohën dhe viteve të fundit thotë të ketë punuar në qytetin e Ulqinit. Gjatë dimrit Hysriu thotë se ka qëndruar kryesisht në Kosovë, por jo aq edhe gjatë verës. Megjithatë, së paku një herë në muaj, ai kishte ardhur në Kosovë.

“Si fëmijë, rrethi e shokët e tij kanë shumë fjalë të mira, është i drejtpërdrejtë, është eksploziv, nuk duron dhe si fëmijë nuk ka durue. Një arsimtar i tiji më pat thënë që është tip tepër revolucionar, një tip që u beson fjalëve të njerëzve. Është naiv, se mos me qenë naiv nuk kish ra qysh u ra, por edhe është i sinqertë. Ne si prind dhe rrethi e çmojmë se është tip i drejtpërdrejtë dhe i sinqertë”, përshkruan Hysriu të birin e tij tashmë të paraburgosur.

Ai është prangosur të martën në Prishtinë në orën 12:51 minuta. Vetëm dhjetë minuta para arrestimit, i ati kishte biseduar me të birin.

“Unë jam dëgjuar me të 10 minuta para se me marrë lajmin që në shtëpinë time kanë hy policia. E kam thirr djalin dhjetë minuta para se me thirrë të shtëpisë. Djali me ka thanë jam tu ardhë në shtëpi, më tha, jam në Prishtinë e jam t’u ardhë në shtëpi”, tregon Hysriu.

Familjarët e kishin njoftuar se po i bastisej shtëpia dhe nga Gjilani, Hysriu ishte nisur drejt fshatit. Arsyet e bastisjes i kishte kuptuar vetëm pasi kishte hyrë në fshat dhe kishte parë policë edhe në shtëpinë e shokut të djalit të tij, Musli Hysenit. Edhe Musliu është i arrestuar sikurse që janë të arrestuar edhe Valon Shala, Ardian Mehmeti, Nuredin Sylejmani e Bekim Mulolli. Në shtëpi, Gencit nuk i ishte gjetur armatim, por armatimi i ishte zënë në dorë.

“Më doli djali nga dora”

Hysriu ka vite që e kishte ditur që djali po shoqërohej me shokë që po mbanin mjekra. Në njërën anë i kishte konvenuar që djali po shkon në xhami, po i falë pesë vaktet e nuk po shoqërohet me shokë të këqij. Por në anën tjetër, kjo edhe e kishte frikësuar. E pranon se djali i ka dalë nga dora që nga mosha 15-vjeçare.

“Si i ka ba 15 vjet më ka dalë prej dore. Ka fillu mu shoqëru me ta, me nejt me ta, me djemt me mjekra”, thotë Hysriu, duke përsëritur se djalin ia kanë “futur në lojë”.

Ndryshimet tek i biri i kishte vërejtur kur dy vajzat e tij iu kishin ankuar për presionin që po ua bënte vëllai. Vajza e madhe e tij është studente, por Genci thotë të ketë bërë presion tek motra e tij e vogël që ajo të mbulohej.

Genci ishte martuar në prill të vitit të kaluar. Nga ajo martesë ai ka një vajzë tashmë gjashtëmuajshe. Babai i tij thotë të mos ketë qenë pro asaj martese ku nusja sot e asaj dite është e mbuluar me të zeza dhe as sytë nuk i shihen.

“Na sot erdhëm me e pa në paraburgim. Mua më lanë, edhe vajzën e lejuan me pa, por jo edhe nusen e tij. Nusja e tij është e mbuluar dhe nuk ka as letërnjoftim, pasi që për bindjet e Gencit fotografimi është haram dhe për këtë arsye nusja edhe nuk ka letërnjoftim”, thotë ai.

Telashin e parë me të birin, më 1 gusht të vitit të kaluar

“Është e vërtetë që djali im më 1 gusht të vitit të kaluar është arrestuar me dy shokë të tjerë. Ai është arrestuar në Pasjak për shkak se tek ta është gjetur një pistoletë dhe disa fishekë. Djali jem është mbajt në paraburgim bashkë me shokët e vet, janë liruar pas 48 orëve”, thotë i ati i tij.

Nga ai moment, ai thotë të jetë munduar t’i qëndrojë afër të birit, ndonëse vetë i biri disa herë i kishte thënë që nuk po bën asgjë keq. I kishte mbetur hatri edhe kur i biri kishte shkuar në Stamboll, pasi synonte të vazhdonte për studime në Egjipt. Por ai thotë që djali vetëm një natë ka qëndruar në Stamboll. Hetuesia ndërkaq dyshon që Genci ka qenë në Siri dhe nga koha e kthimit të tij edhe e kanë përgjuar. Babi i tij e mohon kategorikisht këtë duke shtuar se i tërë ky arrestim është bërë për interesa të ndryshme. Djalin thotë se ia kanë maltretuar pasi që e kanë arrestuar.

“Nuk i njoh të arrestuarit e tjerë përveç shokut të djalit tim. As shoku i tij kurrë s’ka qenë por në shtëpinë time kanë qenë persona të tjerë që janë me mjekra e të cilët nuk janë të arrestuar”, thotë Selimi, teksa ata që e kanë inkriminuar djalin e tij në këtë frymë, të cilët edhe vetë i ati e pranon se është ekstremiste, thotë që i din me emër e mbiemër por tash, sipas tij, nuk është koha që të flitet.

Njëri nga hetuesit policorë i kishte thënë se djali yt ngarkohet se ka rrahur fizikisht dy shtetas amerikanë më datën 3 nëntor. Me këtë datë, Hyzriu thotë se kishte qenë tërë ditën me të birin.

Madje Hyzriu tregon se si djali i tij është rritur me dhuratat që ia kanë sjellë ushtarët amerikanë në Kosovën e pasluftës kur Genci ishte fëmijë.

Hysriu kishte punuar në pasluftë si administrator lokal dhe si i tillë thotë që amerikanët si paqeruajtës në rajonin e Gjilanit, kanë hyrë në shtëpinë e tij lirshëm.

“Amerikanët çdo ditë i kanë pru dhurata Gencit, i kanë pru lodra Gencit, çdo ditë ka marrë dhurata. Ata kanë qitë flija bashkë me neve në oborr”, thotë Hysriu, teksa thekson se Hadithet e Kur’anit që i janë ligjëruar djalit të tij janë shtrembëruar.

“Kurani nuk thotë kështu. Kur’ani predikon paqe, mirësi e dashuri mes njerëzve. Dhunë nuk sheh në Kuran. Hadithet që këta i lexojnë, ato kanë një përmbajtje tjetër, janë një shtrembërim i së vërtetës. Ata e shtrembërojnë sipas tekeve dhe qëllimeve të tyre dhe çdo njeri normal, kur e sheh që po i manipulohet fëmija, dikur thotë, kadale stop”, thotë Hysriu, teksa nuk ka intencë që ta lirojë djalin nga burgu si të pafajshëm, por synon që të mos i devijojë djali dhe si i tillë të kthehet pranë familjes, gruas e fëmijës që e kanë.

Hysriu i frikësohet edhe lirimit të të birit

“Këta rrezikohen edhe nëse lirohen. Kam frikë që djali mund të bashkëpunojë me policinë, ngase është mes dy zjarreve, dhunës policore, presionit psikik dhe anës tjetër që nuk guxon me kallxu asgjë nga frika prej ekstremistëve”, përfundon Hysriu teksa tërë ngjarjen e djalit vazhdon ta cilësojë si montim e futje në lojë nga, siç thotë ai “qarqe të caktuara”.



(Vota: 1)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora