Dibran Demaku: Tërmete politike në Kosovë

TËRMETE NË RRJEDHAT POLITIKE NË KOSOVË

Nga Dibran Demaku

Në tregimet e shumta popullore për personazhin e njohur të barcoletave në përmasa botërore,Nasradin Hoxhën thuhet:Autoritetet e vendit për të gjitha të bëmat e tij e kishin dënuar Nasradinin më dënimin më të rëndë-me varje. Trekëmbëshin për varje e kishin vendosur mbi një rrjedhë uji. Kur e kishin sjellur Nasradinin me duar të lidhura para trekëmbëshit i kishin thënë:-Ekzekutimi yt me varje do të bëhet në këtë trekëmbësh. Nëse ti je i pafajshëm ashtu si ke deklaruar tashmë sa herë, do të këputet litari dhe ti do të shpëtosh. Nëse je me faj do të vdesësh dhe do të shkosh në ferr për të gjitha të bëmat tua!

Dhe e kishin vendosur në trekëmbësh. Dhe kur të gjithë sa ishin aty prisnin vdekjen e tij kishte ndodhur mrekullia:Litari i vendosur rreth qafës së Nasradinit ishte këputur dhe ai kishte rënë në ujë! Të gjithë sa ishin aty e kishin uruar duke i thënë se kishte shpëtuar ngase kishte qenë i pafajshëm. Me një fjalë kishte fituar drejtësia! Sepse si kishin thënë ata drejtësia vonon, por në fund fiton! Ndërkaq Nasradini vetë kishte deklaruar:-Vërtetë fitoi drejtësia dhe fitova edhe unë, por me prapancë të lagur! . . .

Në rrjedhat politike kosovare si kurrë më parë ditët e fundit po ndodhin tërmete. Tërmete me amplituda të forta të shkallës së Rihterit!  Dhe këto tërmete po e tundin skenën politike kosovare dhe opinionin e gjërë.

Tërmeti i parë po ndodhë me letrat e kryeparlamentarit të Kosovës, z.  Jakup Krasniqit, drejtuar opinionit të gjër kosovar. Në të dy letrat e tij të gjata ai e informon opinionon e gjër për mospajtimet e tij me rrjedhat politike të partisë në pushtet, të PDK-së( që momentalisht është edhe parti e tij!) dhe me kryetarin e partisë në fjalë z.  Hashim Thaqin, kryeministër aktual i Kosovës. Me dy letrat e tij të deritashme z. Jakup Krasniqi shkaktoi tërmet në rrjedhat politike kosovare! Por, tërmeti në fjalë me dy letrat e para ishte me një intenzitet të ulët të amplitudës së shkallës Rihter! Mbase tërmeti me amlitudë të fortë të shkallës Rihter do të ndodhë me letrën e tretë të pritshme! Letra e tretë e kryeparlamentarit Krasniqi, apo amplituda e fortë e shkallës Rihter do të jetë tërmeti që do t`i dridhë deri në themel rrjedhat e deritashme të politikës kosovare?!

Sa do të jenë të dhimbëshme ato dridhje të tërmetit tashmë të filluar do të mbetët të shihet. Dridhjet në Partinë demokratike të Kosovës tashmë kanë nisur dhe një zot e di se ku do të ndalen!

Tërmeti i dytë i cili që në fillim shkaktoi dridhje me intensitet të forte në amplitudën e shkallës Rihter, në rrjedhat politike kosovare dhe në opinionin e gjer është deklarata e para pak ditësh e njërit nga ish komandantët e UÇK-së, z.  Rexhep Selimit në raport me ish kryeministrin e Republikës së Kosovës në ekzil, z.  Bujar Bukoshin. Thëniet e Selimit se ish kryeministri i Kosovës në ekzil, z.  Bujar Bukoshi, gjatë luftës kishte kërkuar nga ata, pra ish komandantët e UÇK-së, që të luftonin kundër kryetarit Rugova, janë tërmet me intenzitet të fortë të amplitudës së shkallës së Rihterit, dridhje këto të cilat mund të jenë me pasoja të mëdha në rrjedhat politike kosovare dhe në opinionin e gjërë!

Sipas analistëve të ndryshëm, nëse thëniet e z.  Selimit kualifikohen si të vërteta, atëherë veprimet e ish kryeministrit të Kosovës në ekzil, në kohën e luftës në Kosovë, z.  Bujar Bukoshit, mund të trajtohen si tradhti kombëtare?! E dihet që tradhtia ndaj atdheut dhe kombit, gjithkund në botë dënohet me masa më të rrebta! Dhe nëse një gjë e tillë vërtetohet, atëherë faji i Bukoshit rëndohet edhe më shumë, sepse është bërë në kohë të luftës, atëherë kur Kosova dhe populli i saj luftonin për jetë a vdekje!

Mbetët që ana tjetër, në këtë rast z.  Bujar Bukoshi, t`i mohojë apo t`i pohojë thëniet e Selimit!  Por, nëse i referohemi asaj thenies së popullit. “se ku ka zë nuk është pa gjë“, atëherë frika se tërmeti i shkaktuar nga z.  Selimi mund të jetë shkatërrues, është e justifikueshme!

Se përse, z.  Selimi e ruajti këtë konspiracion kaq gjatë dhe e tha tash pas kaq vitesh nga mbarimi i luftës, mbetët në ndërgjegjën e tij!  Sidoqoftë me këtë veprim të tij ai së pari e ka lehtësuar ndërgjegjën e vet njerëzore dhe intelektuale dhe së dyti ka hapur rrugë që të kuptohet krejt e vërteta për rrjedhat e luftës në Kosovë dhe për akterët e saj kryesor, qofshin ato veprime që u bëjnë nder atyre, apo veprime që rëndojnë në ndërgjegjët e tyre?!

Se drejtësia vonon, por në fund triumfon, u than ë fillim të këtij shkrimi, në barcoletën pë Nasradin Hoxhën!  Do të donim që drejtësia të fitojë edhe në jetën e përditshme dhe jo vetëm në barcoletat e Nasradinit.

Do të donim që tërmetet e nisura në raport me rrjedhat politike në Kosovë të kalojnë sa me më pak pasoja dhe më me pak dhimbje për Kosovën dhe popullin e saj! Themi kështu sepse, Kosova dhe populli i saj kanë vuajtur me shekuj nga tërmete të tilla shkatërruese! . . .